Dear Ikit

Dear Ikit,

Adda nabati ti pimmusay a katugangak a babai a lote ken balay. Nangaramid ti katugangak a lalaki iti Extra Judicial Settlement With Waiver of Rights and Assumption of Mortgage a mangipaneknek a ti amin a karbenganna iti sanikua, itednan kaniak ken kadagiti annakko tangay addan sabali a pamiliana. Nakasalda ti lote ken balay iti GSIS isu a nairaman iti intedna a dokumento ti Assumption of Mortgage. Indatagko ti dokumento iti GSIS nga inted ti katugangak a lalaki kasta met ti Affidavit of Publishing (ta pinaipablaakko ti Extra Judicial Settlement iti maysa a mabigbig a pagiwarnak ditoy Filipinas).

Madama ti Structuring and Condonation ti lote ken balay a nautang iti GSIS dua a dekadan ti napalabas. Naipanagan ti titulo iti GSIS ngem naimarka ti nagan daydi katugangak a babai a kas nakautang.

Pinagpilidak ti GSIS no bayadak a dagus amin nga utang ken penalty (PhP250,000.00) wenno in-inutak a bayadan ti udi daydi katugangak. Ngem no in-inutek a bayadan, adu pay a papeles ti ipakitak a mangipaneknek a kabaelak ti agbayad iti binulan kasta met ti kaadda ti Tax Clearance a mangipaneknek a nabayadanen ti amiliar agingga iti agdama a tawen. Saan a nabayadan ti amiliar iti nasurok a 20 a tawen.

Kayatko a maipanagan dayta a sanikua kadagiti annakko, ikit, ngem awan met ti nawadwad a gastosek, ta sangkabassit met ti sueldok ken pension nga aw-awatek manipud iti pimmusay nga asawak. Ania ti aramidek, ikit?—Cristina

Kaanakan Cristina,

Kamakamem ti Condonation and Restructuring ti Housing Loan nga indiaya ti GSIS. Dayta PhP250,000.00 a kuenta ti GSIS, nalaka laengen nga iremedio. Sayang ti interes no bayadam iti binulan. Namnamaek a ti presio ita dayta a sanikua ket mamindua wenno maminlima pay ngem PhP250,000.00.

Yutangmo dayta pensionmo gapu iti pannakabalom wenno dayta sueldom dita opisinayo iti SSS/GSIS. Wenno umutangka iti katugangam a lalaki.

No talaga nga awan ti mairemediom a pagbayad ita, iremediom dagiti papeles a masapsapul tapno mayalis kenka ken kadagiti annakmo ti sanikua tapno mayaplikarmo a Housing Loan-mo.

Mabalinmo met nga ilako babaen ti Deed of Sale with Assumption of Mortgage. Ngem apay nga ilakom no kabaelam pay met la a bayadan? Pakalaglagipan dagita annakmo dayta iti amada Mabalin met nga ipaupam tapno adda pangalaam iti pagbayadmo iti binulan.

Agsublika diay GSIS, wenno agsuratka; ilawlawagmo iti problemam ket alaem manen ti opinion wenno pammagbagada.— Ikitmo