Idi Un-unana a Panawen: Ti Datdatlag a Tambor ti Ari

IDI un-unana a panawen, adda ari nga agnagan iti Efriam. Isu ti ari ti pagarian a managan iti Calabar. Managayat iti kappia ti ari; dina kayat ti gubgubat. Addaan isuna iti datdatlag a tambor a no patitenna, mangipaay kadagiti nakaad-adu a naimas a makan ken mainum.

Isu a no adda a pagarian a mangideklarar iti gubat kontra iti Calabar, ayabanna dagiti kabusorna ket patitenna ti tamborna. Anian a siddaaw dagiti kalabanna ta agparang dagiti adu a makan ken mainum. Agsasangoda ngarud a siraragsak ket adu pay dagiti ipabalonna kadagiti kalabanna a nagbalinen a gagayyemna.

Ti laeng pagdaksanna, no ti akinkukua iti tambor ket makapayat iti uray bassit laeng a ruting, mabangles amin dagiti makan. Malaksid iti dayta, agparang ti 300 nga Egbo wenno mannakigubat manipud iti sabali a lubong ket bautbautenda ti akinkukua iti tambor agraman dagiti sangaili.

Iti maysa nga aldaw, napan pinadigos ti maysa kadagiti asawa ti ari ti anak daytoy nga ubing a babai iti maysa a waig. Buybuyaen met ida ti maysa a pag-ong nga adda iti tuktok ti maysa a kayo. Natnag ti maysa a bunga ti kayo ket pinidut met ti ubing, sa kinnanna daytoy ta pudno met a naimas.

Makaunget ti pag-ong nga immulog ket pinabasolna ti ubing iti panagtakaw.

“Ipulongko iti ari daytoy nga inaramid ti anakmo!” kinuna ti pag-ong ta iti dayta a pagarian, nakaro a panagbasol ti panagtakaw. Iti pampanunot ti pag-ong, no saludsoden ti ari no ania ti kasukat ti bunga a tinakaw ti anak daytoy, ibagananto a ti datdatlag a tambor ti kayatna a kasukat.

Pudno a nagpulong ti pag-ong iti ari, ket agpayso, dagus a sinaludsod ti ari: “Ania ti kayatmo a sukat ti bunga? Ibagam ket itedko!”

“Ti datdatlag a tambor!” dagus a kinuna ti pag-ong.

Ket gapu ta mamati ti ari a ti sao, isu ti rupa, intedna ngarud ti datdatlag a tambor iti pag-ong.

Idi addan ti pag-ong iti yan ti mulana a kayo, dagus a pinatitna ti tambor ket nagparang dagiti agkakaimas a makan. Inayabanna amin nga ayup iti kabakiran. Ngem anian ta bayat ti pannanganda, nagangin ket adda natnag a ruting manipud iti kayo a napayat ti pag-ong. Nabangles dagiti makan ken nagparang dagiti 300 nga Egbo ket binautbautda ti pag-ong agingga a nagrikki ti bagina. Binautbautda pay dagiti sangaili.

Gapu iti dayta, insubli met laeng ti pag-ong ti datdatlag a tambor iti ari. Manipud met idin, gagangayen nga aglemlemmeng ti pag-ong iti uneg ti danum ta sapsapulen dagiti leon.—O

(Sarsarita idi ugma manipud iti Nigeria.)