Manila Bulletin

Taraken: Naariwawa Dagiti Pusam iti Rabii?

Leonora R. Melchor

SAAN laeng nga aso ti paggugustok a taraknen; pati pusa. Pagsayaatanna, dida makiap-apa kadagiti asok. Adda bukodda a teritorio. Ditoy salas, balkon ken kuartok ti teritorio dagiti asok. Iti met kosina ti teritorio dagiti pusak.

Tunggal aglutoak, adda latta dagiti pusak a manglagidlagid kadagiti sakak. Ti aramidek no kua, ubbaek ida uray mabiit laeng.

Ngem adda maiduma nga ugali dagiti pusak. Dagiti asok, umariwawada no adda sabali a tao a sumrek iti balaymi. Dagitoy pusak, umariwawada tunggal rabii. Masemsemak no dadduma. No saan, kumalimbatogda. Makigkigtotak ken matukay ti turogko. Mairaman payen a mapuyatan ti pamiliak.

Idi damo, bumangon ti kaingungotko a mangbugbugtak kadagiti pusak. Lalo la ket ngarud a mamurmurayanakon. Narigatton a makaturogak. Agingga nga agtinnag a mapuyatankami aminen a sangapamilia.

Naaddaanak ngarud iti problema maipanggep kadagitoy pusak. Kuna ti kaingungotko nga ibellengna kano dagiti pusak iti adayo a disso. Ngem tinubngarko. Uray kaskasano, diak maitured nga ibelleng ida. Napanunotko nga ipakonsultar dagiti pusak iti beterinario.

Kabigatanna, ubbaubbak dagiti pusak a napan iti beterinario. Dagus a tinamingdakami. Dinamag ti beterinario no ania ti masintirko a sakit dagiti pusak. Imbagak nga awan, laeng amangan no adda sakitda a dida maibaga, isu nga umariwawada iti rabii.

Inlawlawag ti beterinario a kastoy a talaga dagiti pusa. Ngem adda pamuspusan tapno dida umariwawa. Umuna, suruak kano dagiti pusak a dida matmaturog unay iti aldaw. Ikkak kano iti abalbalayda tapno adda pagpalpalabasanda iti oras. Kas koma iti tali a narolio. Mabalin a lima a metro ti kaatiddogna. Iroliok ti tali, kalpasanna ipaay-ayamko kadagiti pusak. Iti daytoy a wagas, maliklikan ti pannaturogda iti bigat wenno aldaw. Maikadua, masapul a pakanek ida iti rabii tapno dida umariwawa no mabisinda. Ikkak met ida iti inumenda a nadalus a danum. Maikatlo, kasaritak kano dagiti pusa, ta uray man dida makasao a kas tao, makaawatda met. Maikapat, dimi kano bugbugtaken ida ta yad-addada ti agariwawa. Nasaysayaat pay nga adda soft music a mangmangngegda iti rabii.

Inaramidko dagiti imbalakad ti beterinario. Sipud idin, saankamin a makigkigtot iti rabii. Nairuten ti pannaturogmi a sangapamilia.—O

Itoy A Bilang

ilo-ph

2023-06-01T07:00:00.0000000Z

2023-06-01T07:00:00.0000000Z

https://manilabulletin.pressreader.com/article/282063396350022

Manila Bulletin Publishing Corp