Manila Bulletin

Edukasion: Nagduduma ti Paglaingan

Aileen R. Rambaud

“AWAN sa ti paglaingan ti anakko.” Adda dagitay mangmangngeg a kastoy kadagiti nagannak. Saan a pudno dayta. Iti uneg ti pagadalan, nagduduma dagiti aktibidad. Maduktalan ni titser dagiti paglaingan dagiti ubbing. Adda nalaing iti musika. Adda paggugustona ti agsala. Adda aginteres iti panagdaniw ken literatura. Adda pay dagiti agduyos iti siensia ken matematika. Magustuan ti dadduma ti agdrowing wenno agpinta. Kaykayat met dagiti dadduma ti agdiskurso. Adda met dagiti naulimek a kaykayatda ti agsuratsurat. Adda met dagiti nalaing iti isports.

Iti sabali a pannao, nadumaduma ti paglaingan dagiti ubbing.

Ala, wen, manang, mabalin a saan a nalaing ti anakmo iti matematika ngem nalaing met iti isports. Saan a nalaing iti musika ngem nalaing met nga agsurat iti daniw. Masapul laeng a takuaten ti mannursuro dagiti paglaingan dagiti ubbing ket tulonganna ida a mangpasayaat pay kadagita a paglaingan. Iti kasta, dumakkel met ti panagtalek dagiti ubbing iti bagbagida.

Nagrigat man ngamin nga ibagam a kuneng ti maysa nga ubing. Nakuneng iti ania? Awan ti nalaing iti amin a banag. Wenno awan ti mangbukbukod iti amin a paglaingan. Isu a dimo idilig ti anakmo iti sabali, manang. No ti kaarrubayo nga ubing ti kalaingan iti klase iti benneg ti akademiko, adda met sabali a paglaingan ti anakmo.

Kas iti duktalmi iti bukodmi a pagadalan. Adda dagiti sumasala. Isuda dagiti natudingan nga agpabuya iti programa ti eskuela wenno iti parambak ti ili ken probinsia.

Adda met nalaing nga agdrowing. Isu ngarud ti nakisalip iti poster slogan nga intuyang ti munisipio idi “Nutrition Month.” Agasem ti siddaaw dagiti kaeskuelaanna idi inyalatna ti umuna a gunggona?

Adda met adalan a no panagsala ti pagsasaritaan, adda la iti likud. Ngem idi pinagdrama ni titser, isu ti kalaingan iti panagarte. Pinalpalakpakanda.

Ngarud, manang, dimo ibaga a saan a nalaing ti anakmo. Adda amin paglaingan ti tao. Nagduduma ti paginteresanda. Isu a daytoy ti maysa a duktalen dagiti titser ken agay-aywan kenkuana. Iti kasta, kas nakunan, dumakkel ti panagtalekna iti bagina—ket mabalin pay a matakuatanna dagiti sabsabali pay a paglainganna.—O

(Agpapaay ti autor a prinsipal ti Salanap Elementary School ken Puzol Elementary School, agpapada nga adda iti Distrito ti Pinili, Ilocos Norte.)

Itoy A Bilang

ilo-ph

2023-06-01T07:00:00.0000000Z

2023-06-01T07:00:00.0000000Z

https://manilabulletin.pressreader.com/article/282080576219206

Manila Bulletin Publishing Corp