Showbiz

ARAPAAP a pimmudno para ken ni Lovi Poe ti pannakairamanna iti teleserye nga “FPJ’s Batang Quiapo” a bersion ti pelikula daydi amana a ni Fernando Poe Jr. a rimmuar idi 1986 a nagparehaan da FPJ ken Maricel Soriano.

Wen, ta daytoy a pelikula ti kangrunaan a paggugusto ni Lovi a proyekto daydi amana.

Kuna ni Lovi a napalalo ti kigtotna idi maidiaya kenkuana ti proyekto, kas kaasmang ni Coco Martin (a direktor pay ti teleserye).

Idi nagbalin a kameng ti Kapamilya Network ni Lovi idi 2021, nadakamatna a makaaramid koma met iti proyekto a bersion dagiti pelikula daydi FPJ.

* * *

Iti saludsod no panangitultuloy daytoy iti legacy wenno tugot ni Da King, kuna ni Lovi a saanna a kabaelan.

Kunana ketdi nga ar-aramidenna met dagiti bambanag a mangpadur-as kenkuana a kas maysa nga aktres.

Daytoy ti gapuna a saan nga isu laeng nga isu ti akem wenno papelna kadagiti teleserye ken pelikula.

Malaksid iti daytoy, nangbukelda ken ti nobiona iti maysa a kompania ti produksion.

Manamnama nga iruarda ti pelikula nga “Alyssa” nga idirehe ni Jerrold Tarog. Kasta met nga adda script nga ilepleppas ni Lovi.

* * * Ni Barbie Imperial ti maysa kadagiti immuna a kimmablaaw kalpasan nga inako da Marco Gumabao ken Cristine Reyes ti relasionda.

“Cuzzo” (para iti kasinsin) ti awag ni Barbie ken ni Marco ta Imperial ti apeliedo ti ina ni Marco.

Uray ni Paolo Gumabao a kabsat iti ama ni Marco, maragsakan iti relasion da Marco ken Cristine.

Kinapudnona, no amirisen, ad-adu ti maragsakan iti relasion da Cristine ken Marco ngem dagiti mangsutsutil kadakuada gapu iti komento ni Cristine iti kallabes.

Isu nga iti account iti Facebook ni Cristine, inkabilna iti Ingles a saandan a “tropa” laeng ken Marco.—O