Kayatko a Siakto ti Mangaywan iti Anakko ken ni Derek, Kuna ni Ellen

IMPASIGURADO ni Ellen Adarna-Ramsay a saan nga adaptaren ni Derek Ramsay nga asawana ni Elias Modesto Cruz nga anak da Ellen ken John Lloyd Cruz.

Kuna ni Ellen nga adda met ni Lloydie a tumaktakder nga ama ni Elias. Kinapudnona, mapan a 12 nga aldaw iti kada bulan nga adda ni Elias iti poder ni Lloydie.

Kabayatanna, kuna ni Ellen nga iti daytoy Hunio, panggepda ken Derek ti mangbukel iti anak. Daytoy ti gapuna a saan pay laeng nga agaw-awat ni Ellen kadagiti proyekto iti telebision ken pelikula.

Innayonna a no bilang mapagasatanda ken Derek a maaddaan iti anak inton umay a tawen, mangbilang pay iti pito a tawen sa manen umawat iti proyekto ni Ellen. Kunana a kayatna nga isu ti mangpadakkel kadagiti annakna.

Nadakamat ni Ellen a naulimek ti biagda ken Derek ta manmano a rummuarda malaksid kadagiti pasken dagiti pamilia wenno kasingedda.

Adda ketdi dagiti produkto a yen-endorso ni Ellen a kas iti maysa a pagpakitaan iti mata a kakaduana dagiti dadduma a padana nga artista.

* * * Maragragsakan ni Sue Ramirez ta umad-adu ti agbuybuya iti teleserye a “The Iron Heart” a pagkakaduaanda kada Pepe Herrera, Albert Martinez, Richard Gutierrez, Baron Geisler, Meryll Soriano, Jake Cuenca ken dadduma pay.

Mabuya daytoy iti A2Z, Kapamilya Channel, TV5, Kapamilya Online Live babaen ti Facebook ken YouTube, Jeepney TV, ken TFC IPTV.—O