Ading Kosinera

SABALI manen a potahe ti idasartayo. Nairaman met laeng daytoy iti 2023 Menu Guide Calendar, Healthy Snacks and Beverages for Adults nga insagana ti Food and Nutrition Research Institute (FNRI) iti panggep ti ahensia a tumulong a mangipaay iti nasalun-at ken nasustansia a taraon wenno merienda kadagiti umili.

Dagiti Kasapulan

1 tasa a diket a bellaay (glutinous rice flour)

2/3 tasa a danum

1 kutsara nga ube flavoring

15 pedaso a keso; iw-iwaen iti paatiddog (2 pulgada kaatiddogna wenno 5 gramo ti kada maysa a pedaso) 3 tasa a danum, pagpaburekan

½ tasa, nagadgad a niog

½ tasa nga asukar

1 kutsara a lengnga (sesame seeds)

Panangisagana

1. Mangala iti malukong. Ikabil ti bellaay.

2. In-inuten nga ikabil ti danum; gamayen agingga a maporma daytoy.

3. Inayon ti ube flavoring. Ilaok a nasayaat

4. Bingaybingayen ti mixture iti 15 nga apag, agarup 1 kutsara (15g) ti kada apag. Ipinas ti kada pedaso. Ikabil ti keso iti tengngana. I-roll daytoy. Aramiden ti proseso kadagiti nabatbati a ramen.

5. Mangipaburek iti danum. Lutuen ti palitaw iti 6 a minuto wenno agingga a maluto wenno agtapaw daytoy.

6. Adawen ken paubosan.

7. Mangala iti plato. Iwaras ti nagadgad a niog. Ipatulidtid ti naluto a palitaw.

8. Idasar agraman ti asukar ken lengnga.—O