Agkatawa ti Mayat

“Gel, inton makaturpos ni adingko, palubosannakto koman.”

“Adda kadi basolko? Dinakon kayat?” “Amman, unay-unay… ngem at the end of the day, kayatko metten ti agtalna, ti saan nga agliblibas. Nakapagkapitanen ni tatang sadiay bariomi, Gel. Agkaduada ken mayormi. So, mabalin kano nga agyanak iti Opisina ti Konseho ti Ili.”

“Napait met,” nagraed ni Bileg Aurelio, “ta no adda inayatko a kadua ni Riz, sika dayta,” kinunana. “Wenno adda payen ub-ubing?”

“Awan, Gel, ken saan a kuestion ti kinaubing. Actually, you are so young and virile. Ngem purely, for the sake of peace. I may not even like marriage, actually.”

Minatmatan ni Bileg Aurelio ti balasang. Siempre, masirib ni Keith. Ngem nakigtot latta. Ita man pay? Ti ammona, birbiroken ni Keith ti kasar ket saanna met a kabaelan nga ited dayta kadagitoy a gundaway.

“So, before the election?”

“Please, Gel, I am begging you. Please, may we enjoy our remaining togetherness, please. I have been in love with you and I always,” ket immet-et ti arakup ni Keith.

Ngem naglulok ti arakup ni Bileg Aurelio. “No sinaannakto met laeng, Keith, why not now?” Kimmayakay.

“Are you dismissing me, Gel? Saan pay a nakagraduar ti adingko, please,” nagpakaasi dagiti mata ni Keith. “Give me time.”

Kasano itan? Daytoy ti break-up nga adda timebombna? Ket ti tunggal maib-ibus a kanito, ilallalona ti sugat iti puso ni Bileg Aurelio?

“Please, hug me, Gel,” kinuna ni Keith. Ket ania pay? Ngem saanen a kas itay ti kabara ken karugsona.

Ngem iti kaungganna, imbes a maliwliwa ken maisaganana ti bagina para iti hearing iti Senado, nadegdegan la ketdi ngarud ti dagensenna. Ket imbes a dua nga aldawda, inkeddengnan nga agawidda iti malem ti kabigatanna.

KALKALPAS ti nasapa a bayakabak idi agparada ni Thor iti nalawa a parking area ti Senate of Poro Ylocos. Kaduada nga agpayso ni Donia Elenita Dacquel. Alas siete pay laeng ket naulep ti tangatang iti idadateng ti Bagyo Saning. Pannakairanrananan a Shalani Zaldivar, nakuna ni Bileg Aurelio.

Inderetso ida dagiti kameng ti Senate Security Services iti nalawa a holding area nga asideg ti Committee Hall 12. Dita nga urayenda ti panangiserrek ti Sergeant at Arms kadakuada. Adu itayen dagiti kotse a nakamarka iti 7 ti plakana, ngarud kasanguanan ti alas otso, addan dagiti managsapsapa a senador. Iti desarming a diding a sumango iti pasilio, pudno a masarsarutsot ti iseserrek dagiti senador kadagiti atendaranda a Committee hearing.

Adda nurses station iti yanda a holding room ket napan nagpaala iti presion ti dara ni Atty. Jomari Quidez.

“140 over 90, sir,” kinuna ti nurse a nangala iti presion ti abogado. “Relax, sir, you’ll be fine.”

Saanen a napan simmublat ni Bileg Aurelio ta amkenna no nangato met ti presion ti darana. Ngem marikriknana ti iduduek ti sakit iti kanawan a rusokna.

Alas otso kinse idi rummuar dagiti sumagmamano

a kameng ti Senate Security Service. Inyawagda a mabalinen dagiti testigo ti sumrek.

Nagbabaybayda a simrek. Situturong ti mata dagiti senador ken dagiti kameng ti media kadakuada. Intured ni Bileg Aurelio a kinita dagiti senador; ni Shalani Zaldivar a mangrukrukod kenkuana. Kasla ad-adda a bimmangking ti panagplastar dagiti bibig ti senadora ta naglaw-as ti dumerosas a lumabaga a bibigna. Nakacoat daytoy iti derosas.

Komite pay laeng ti Environment and Natural Resources daytoy. Napatak kadagiti naawis iti paset ti gobierno ni USec. Warlita Arutang Naval, ti babek a panomtomboyen a nangpaserra kadagiti pagminasan. Kasla naisupot ita a patupat iti suotna nga olive a coat. Gampor a naangrag ti langa ti napunggos a buokna.

Impatugawda ida kadagiti nanaganan a disso. Nagtugaw da Keith ken Thor iti likudan, kasta met dagiti kameng ti legal staff ti Razon-Colorado Group. Nagtugaw met ni Donia Elenita Dacquel dita. Kimmamakam ni Don Emilio Yabes kalpasanna.

Naibunong dagiti bottled water. Dadakkel. Ammo ngata dagiti kameng ti Senate Mess a masapul dagiti testigo ken senador ti adu a danum. Ni Sen. Chaz Cordero, ti guapo a senador a nakaasawa iti celebrity ti chairman ti komite. Napagsapata a dagus dagiti testigo, kas nakairuaman. Iti rabaw ti Biblia, imparabaw ni Bileg Aurelio ti imana sa sinurotna ti sapata nga imbasa ti sekretaria ti komite. Nayam-ammo met dagiti dimmaray ken ti akemda.

Pagpiaanna, nataldiapan ni Bileg Aurelio ti Sen. Azenith Ricavilla a mangpalpaliiw kadakuada. Uray kaskasano, iti kaadu ti ibagbagada a basol ti nabaknang a senadora kadagiti tattao, mabalin nga isakit daytoy ida.

Linuktan ni Senador Chaz ti meeting ti hearing babaen ti panagsao ni Sen. Pinggoy Entrata a nangipila iti resolusion a mangayab kadagiti maseknan. Indetalye ti senador a rumbeng a marepaso ti paglintegan kadagiti pagminasan agsipud ta agduapulon a tawen ken agsipud iti kadda dagiti demand iti sangalubongan kadagiti earth metals.

Dimmanon ti panagbitla dagiti mega-minesites iti Caduyongan ken Caantengan. Adda pay PowerPoint ti senador a nangipakitaanna iti kinalaad dagiti manarimaan a dinalapus ti strip mining. Nakadaddadakkel ti karatula: Poro Ylocos Minerals and Oils ken ti CEO, Mr. Bileg Aurelio Puritac Colorado, Min. Eng.

Kalpasan dayta, naipakita dagiti processing plant dagiti pagminasan kasta metten dagiti papanan dagiti mine tailings ken dagiti tailing confinement and processing dams, a sumagmamano kadagitoy ti addaan iti ubo a mapan kadagiti pagtatalonan dagiti tagabantay.

Ammon ni Bileg Aurelio nga iti kaadda dagiti tagamedia ken iti kinaranggas dagitoy a mangretrato kadagiti dadakkel nga slide, maukrit manen ti sugat a kayatna a leplepan. Simmublat a nagsarita ni Naval ket nakaad-adu dagiti datos nga impresentarna.

Sumagmamano a senador ti nagsaludsod ngem saan pay laeng a nagtagari ni Shalani Zaldivar. Ket idi yawagda ti naganna tapno agtestigo, inyangad ti senadora ti ulona sa kinusilapanna ni Bileg Aurelio.

(Maituloyto)