Sarita a Para Ubbing

“MAYSA, dua, tallo… napanan ni inayo?” idandaniw ti ubing bayat ti naannad a pannagnana iti nailet a dana. Adda sarukodna ken adda iggemna a nalaga a

bay-on.

“Uppat, lima, innem, naglako iti kankanen,” adda nangituloy. “Pito, walo, siam, napan idiay karayan?” adda pay sabali a nangituloy.

Naaamo dagiti boses a timek-nataengan. Ita laeng a mangngeg ti ubing.

Dua a dadakkel a kulibangbang ti mangsursurot kenkuana. Kiaw ti maysa.

Natingra a derosas ti maikadua.

“Asinokayo, tata?” kinuna ti ubing, ta sinursuruan ni nanangna nga agdayaw iti in-inauna ngem isuna.

“Siak ni Kiaw!” kinuna ti amarilio a kulibangbang.

“Siak ni Derosas! Hi-hi-hi!” kinuna met ti derosas a kulibangbang. “Ita pay la a makangngegak iti kakasta a nagan!” inkatawa ti ubing. “Ania ti naganmo itayen?” sinaludsod ti kiaw a kulibangbang. “Xyrel Gregorio Cornelio…”

“Cornelio ti apeliedom?” sinaludsod ti derosas a kulibangbang.

“Saan, tata! Tallo ti naganko! Dayta Gregorio ken Cornelio, nagan dagiti lilok! Ngem diakon nakitkita ida. Diak kano pay nayanak idi natayda!”

Nagkatawa ti kiaw a kulibangbang a kasla awan nangngegna. “Napintas ti Gregorio. Isun ti naganko!”

“Cornelio kaniak!” kinuna ti derosas a kulibangbang.

“Ngem papanam, barok?” sinaludsod ti kulibangbang nga agnagan itan iti Gregorio.

“Innak idiay yan da lilak a Catalina!” kinuna ti ubing. “Ni lilak, isu ti asawa daydi lilok a Gorio.”

“Adda pay iggemmo a bay-on!” kinuna ti kulibangbang a Cornelio.

“Innak ikkan ni lilak iti tinuno a manok, tata!” kinuna ti ubing. Nagsardeng. Impakitana ti nagyan ti bay-on. Dua a pitso ti manok a natudok iti asador ken nabungon iti bulong ti saba.

“Nagsayaaten ni nanam ta padpadiguanna ni lilam!” kinuna ni Cornelio a kulibangbang.

“Idiay balaymi ti pagyananen ni lilak, tata” inistoria ti ubing. “Ngem nagawid. Kunana nga idiay pay la balayda idi ken lilo nga agyan! Pinatarimaanna ti kalapawna ken ni tatak!”

Nagkatawa ni Cornelio a kulibangbang. “Mailiw, abalayan!” kinunana.

Nagkatawa met ni Gregorio a kulibangbang. Ngem idi agsao, kasla adda nagtukel iti karabukobna. “Wen, abalayan.”

“Innakon, tata,” kinuna ti ubing. “Isagpaw ngamin ni lila ti maysa a tinuno iti abrawenna a bulong ti marunggay!”

“Umunakan ta surotennakami!” kinuna ni Gregorio a kulibangbang. “Lilo ti awagmo kadakamin, a!”

“Lilo?” Nagkatawa ti ubing. “Wen, liloooo!” Nagkatawa manen ta mailiw met nga adda awaganna iti lilo.

“Maysa, dua, tallo, napanan ni inayo?” kinuna ni Cornelio.

“Uppat, lima, innem, naglako iti kankanen!” impasaruno ni Gregorio.

“Pito, walo, siam, napan idiay karayan!” impasaruno ti ubing a maragsakan unay.

Saoda a sao agingga iti nakadanonda iti kalapaw iti kamanggaan iti arsadanan ti turod.

Daras nga immulog ti maysa a baket manipud iti kalapaw idi ipukkaw ti ubing: “Lila, ni Xyrel daytoy!”

Inapungol ti baket ti ubing. “Ay, apok, aya! Kasla adda matam nga immay! Nasapsapaka ita ngem idi naminsan a lawas!” Innalana ti sarukod ti bulsek nga ubing.

“Sinurotko da Lilo Gregorio ken Lilo Cornelio, lila!” inkatawa ti ubing.

“Diosko a manangngaasi! Ti la sasawem nga ubing!” kinuna ti baket a kasla naglamiis pay.

Awanen dagiti kulibangbang.—O