Ayus

Ingget anus nga agdaliasat

Ti ayus ti danum a nagtaud

Iti kumidkiddit a tubbog Ti makiin-innanus nga ubbog iti surong...

Agiwes-iwes iti babaet Dagiti dadakkel a bato; Tapuakenna dagiti natatayag Kalpasan ti sung-al— Agparnuay iti babassit a burayok; Mangpartuat iti lukong

Ti danum a pagpallailangan Dagiti maay-ayo a sirawsiraw Ken pagpatpatawan metten Dagiti naregreg a bulong Manipud kadagiti sanga ti kayo Iti lawlaw ti pikkan.

Uray kangitingitan ti kalgaw Gumanetget ti ayus ti danum Nga aguyas iti waig— A pangnamnamaan met Dagiti taltalon ken bangkag; Pagpipingitanda ti adda Agingga a madanon manen Ti yar-ararawda a panagdarison Ti ayus ti danum iti pikkan

Iti idadateng ti panagtutudo.

--MARLON A. RODRIGO