Dandaniw a Para Ubbing

Atis, Bayawas, ken Saba Ni ROSARIO RIVERA-LAMUG

Ading, nakakitaka kadin iti atis? Ammom, ukisna ti agugis-ugis Bukelna ti babassit ken nangisit Anian, napalalo ti inna kasam-it.

Naimas ti bayawas ni Apo Sta. Maria Babassit ngem namsek iti bitamina No manganka agbalinka a naregta Aglalo no isawsawmo iti asin ken suka.

Manganka pay iti saba a naluom Tapno ti bagim addaan iti potassium No mabalin adda latta iti sangom Tapno isut’ meriendam a kanayon.

Dagitoy a prutas ti rebbengna a kanen Ubing a kas kenka, kudilmo ti sumileng Panunotmo agbalin a nakatadtadem Sagubanit, sakit, kenka ket agbuteng!

Da Singin a Bunga Ni MARLYN GARCIA-DEL ROSARIO

Da Lyn ken Mari

Singin a babbai Nanam-ayda a natagibi

Iti sidong dagiti dadakkelmi.

Agkarkarupada Aruatenda pay ti agpada Saan a mabigbig ti inauna Nangruna no nakatallikudda.

No awagan ida ni nanang “Bunga Uno, umayka man Ni Bunga Dos tulongan.” Agtungpalda met a sidadaan.

Ita, dagitoy singin, dadakkeldan Isu pay laeng ti awag ni nanang Umanayen nga inda pakaragsakan Ti birngasda a naikaubingan!