Apro

dimo maibbatan ti mangmingming iti silap ti naibalangat kenkuana a kinatarnaw a nangbulsek iti bukodmo a panaggilap— impagarupmo a dika mapurar.

nagpaililika iti guyugoy ken sulisog dagiti makabael— makatitileng.

tangtangadem dagiti adda iti ngatuen a tumatayab agnannanam iti nam-ay— kayatmo met ti gumaw-at.

tumtumpawka a kasla gabat iti waig mayan-anudka iti bigat ken rabii— nalipatam ti nagkusay.

bimmatokka a nagpidut kadagiti aragan ken perlas— dika metten limmung-aw.

dardarepdepem ti agbiag iti dimo biag nagindegkan iti lubong ti arapaap— dimon kayat ti agriing.

--PEARL LOVEDYN A. DACUAG