Publication:

Bisaya - 2021-05-01

Data:

TSARDS TO ...

Pulongbay

Ni RONNIE REYES

NAANDAN na karong mga adlawa sa magtiayon nga managsama og kahiligan sa kinabuhi. Apan ang panagtagbo og samang interes ug samang pasyon usa ka talagsaon nga panghitabo. Sama sa primera klaseng jazz pianist sa Pilipinas nga si Henry Katindig ug sa primera klaseng jazz diva nga si Jeannie Tiongco, (anak ni Emil Tiongco sa bantogang Tiongco Brothers Trio sa dekada 60’s). Ang magtiayon nagkuyog sulod na sa napulog siyam ka tuig. Ug mao usab ang panagkuyog sa ilang pasyon. Si Henry nagdako sa Kamuning, Dakbayan sa Quezon. Ang iyang kinasayohang kasinatian sa musika mao ang pagpaminaw og daghan kaayong musika gikan sa bantogang mga musikero sa jazz ug ang pagtambong sa gig sa iyang amahan. Si Henry nagtuon og musikang klasikal sa edad nga siyam sa Yamaha School Of Music. “It was basically innate and been in my dreams to be a musician at a young age,” pagpasabot ni Henry. Bisan tuod ang iyang abilidad sa pag- conduct ug pag- arrange iya lang nakat-onan sa kinaugalingon, ang mga tambag sa iyang amahan nakatudlo kaniyag daghan ilabi na kalabot sa pag- perform. “Just be yourself, master your craft and most of all keep your feet on the ground and couple it with prayer before you perform and thank God for his guidance,” paghanduraw ni Henry. Ang iyang amahan, si Eddie Katindig o mas nailhan sa bantogan na kaayong ngalan sa musika isip Eddie K., miyukbo sa atake sa kasingkasing kaniadtong Disyembre 2017. Uban sa kaliwatang musikanhon nga nagpakaylap sa pipila ka gitamod nga mga haligi sa jazz sa nasod, adunay pipila ka tigpaniid ang nag-ingon nga ang paingnan ni Henry ingon sa gilatid nang daan. Si Henry adunay lima pa ka laing igsoon ug duha sa iyang igsoong lalaki ang musikero usab. Si Tateng Katindig kinsa usa usab ka piyanista, atua na karon magbase sa Estados Unidos. Si Stix Katindig, usa ka tambolista nga atua na magtrabaho sa gawas sa nasod, magtokaran sa usa ka cruise ship. Apan bisan pa sa personal nga kalamposan sa iyang mga igsoon ug kaliwat— lakip na ang iyang uyoan nga si Romy Katindig ug ig-agaw nga si Boy Katindig nga mga virtuoso sa piyano— si Henry mikulit usab sa iyang ngalan pinaagi sa ekstensibo nga pagbansay-bansay ug sa samang higayon, naglalang og kaugalingon niyang estilo sa musika. Sa minglabayng mga dekada, ang kabatid ni Henry Katindig sa keyboard naghatag kaniyag igong luna sa kasaysayan sa lokal nga jazz. Bisan kon motokar siyag pop o yanong jazz fusion, ang iyang kinaugalingon ug talagsaong estilo midihog kaniya isip tigbansiwag sa sulo ug tigpanalipod sa jazz sa Pilipinas. Iyang napakita unsang matanga siya sa kalag isip respetadong lider, sideman ug first-call session artist, ug ang iyang world-class nga kahanas sa keyboard nahimong imortal sa dili na maihap nga mga recording ug jazz festivals dinhi sa ato ug sa gawas sa nasod. Sanglit usa ka kugihan nga musikero, atong masaksihan kanunay ang iyang mga pagtokar sa dinagko ug ginagmayng minor jazz event sa sulod ug gawas sa kaulohan. Sa dihang si Richard Merk, usa ka samang jazz artist nanginahanglan og tabang, si Henry Katindig mitanyag sa iyang talento nga way bayad sa pagpangita og pundong salapi nga gikinahanglan alang sa operasyon ni Richard pinaagi sa usa ka Fundraising Benefit Show sa 19East sa milabayng 2018. Bisan anaa sa jazz ang iyang kasingkasing, ang nag-unang pipila ka propesyonal nga gig ni Henry nagtokar siya og pop, blues ug bisan gani rock. Si Henry nagsugod sa pagtokar kaniadtong 1978 sa usa ka show band nga ginganlan og Centerfold Band. Nakahimo usab siyag mga sesyon isip musikero alang sa Pinoy Rock guitar icon nga si Wally Gonzales ug mitugtog usab siya kauban ang iyang amahan. Ug dili pa lang dugay, nakigsalo siyag bantawan kauban si Mike Hanopol sa 19East. “When I was young, I idolized Mike because of his musical style,” pag-angkon ni Henry. Sa paglabay sa katuigan, iyang giisip ang iyang kaugalingon nga bulahan tungod kay nakauban ug nakatrabaho niya ang pipila sa labing dagkong ngalan sa jazz fusion scene, sanglit nakauban man niya si Pauline Wilson sa Seawind ug Laura Fygi isip ilang musical director. Apan unsa man ang iyang dili malimtan nga gig? “Playing with my dad, and to some international jazz artists at Java Jazz 2007/2015 Euro Pinoy Jazz Fest. It was a magnificent night of musical nomenclature,” pagsaksi ni Henry. Ang Henry Katindig Contemporary Jazz Group nagsugod sa Strumms sa Makati, ug regular nga magtugtogan sa Conrad Hotel C Lounge sa MOA Complex. Ang iyang bugtong nga album mao ang “You and Me” niadtong 2011 ug nakaani og makabungog nga kalamposan. Ug ang iyang ikaduhang han album sugdan na usab unya sa pag-ugmad sa dili madugay. — ( Ikaduha ug Kataposang Bahin) TATAW nga inosente pa kaayo si Kai niining bahina sa mga desisyon sa iyang kinabuhi. Busa walay laing mabasol ning maong kapalpakan. Mahimong nagsumala sa iyang amahan/ pamilya, o sa handler niya nga East West Private. Ang tukma man god mao nga ning higayona angay nga tisado ang hikot sa ilong nga punterya sa usa ka butang lamang: sa basketbol, ug basketbol, ug basketbol lang gayod. Uwahi ra unta ang uban, pananglit mga saybit sa ubang koponan ug commercials nga mamahimong makita ubos sa ngalan nga Kai Sotto. Sakto ang ingon sa kadaghanan: “Ang dalan sa NBA tagsaon ra kaayo kaysa Gilas nga naa ra man na.” Hinuon, naa say mobawos “Uska palabra de honor gyod ang gihimo ni Kai bahala nag unsa pa na ka- NBA na, basta tawag na sa panginahanglan sa yutang natawhan dili gyod mahimong talikdan. Aydol gyod!” Nan karon, gumikan lang kaha sa quarantine protocols, miuli sa Pinas ug kay napalpak, maong mobalik na man og sulod sa G League bubble, abi kay dili man loyal maong gibuwagan si Kai sa hinigugma niya nga Ignite? Unta, kompleto ug sakto man ang pananghid sa mga hingtungdan? O tingali, aduna pay mas lalom gayod nga rason nga anaa lang nagtingkagol sa mga dughang puno sa kahiubos ug samaran? Bitaw, walay nasayod. Sa bisan unsang kambas sa kinabuhi nga may kalambigitan sa ‘ legasiya’ ug ‘ bahandi’, dinhi sa yuta, sa dagat ug bisan sa kapunaw- punawan, nga bisan unsaon nimo og tila ug pagpakita sa imong mga prinsipyo ug kamaayong laki, apan ang hukom wala na sa atoa kondi nagsandig na sa ‘ laing mga tawo’ – dinhing bahina nga motaniag ang bulok sa pulong bias. Usa ka dakong tinuod, nga nagpadayon pa gihapon ang diskriminasyon ( o kaha politika) hangtod niining mga adlawa ilabi na sa mga Asyano nga parehas nato. Siyempre, ang usang ngalan nagkinahanglan nag taas ug hugot nga preparasyon aron moalimyon unya mamahimong usa ka dakong negosyo sa paghingkod sa panahon. May uban nga gikan pa ganis elementarya hangtod sa hayskol. Ug kini ang kamatuoran, gikan gayod sa pagsugod og kupot og bola, pila ka gatos ka libo kaha ka kabataan ang nangambisyon usab niining maong liga. Dili layo sa posibilidad nga sa pagkangang gikan lang sa yutang Pilipinas kining ginganlag Kai Sotto, busa layo ras luwag. Tingali, pasado ug anaa lang si Kai sa level nga uska average player nga puydeng makasulod og NBA. May height, anaay tira sa gawas, may lihok, ug kamao mopasa. Ang klarong kulang mao ang kabingkol sa lawas isip pundasyon sa depensa— ang numero unong puhonan. Unsay mahimo nato kon sa tan- aw sa mga ‘ dagkog tai’ walay tsans sanglit ang ilang manok na lang maoy pilion. Tataw nga kining butanga gawas na sa atong paghukom. Ug unya, dili mahimong liatan ang bikil batok sa dinalhan ni Coach Brian Shaw sa Ignite. May huhungihong nga dili malipayon si Kai sa team kay dili kaayo mahatagan og igong oras. Kon makasulod man, kadali ra ug dili pa mapasahan og bola. Gani, sa usa ka interview bahin sa pag- uli ni Kai aron moipon sa Gilas, maorag igo man lang miingon si Coach nga “Bahala na si Kai kay kining torneyo sa G League alang ra man usab hinuon nis mga guwardiya.” Klarong padungog- dungog nga wala ra man gihapoy gamit sa gidumala niyang koponan si Kai. Mao ra ni sa chess. Kinahanglan nig trial and error. Usa ka desisyon nga timgas. Kon nagpadayon si Kai sa Ignite klarong mabangko lamang siya busa hanap pa sa pesong panas nga may koponan nga mobunlot niya puhon sa draft. Mao nga mas bali nang magpa- Gilas na lang alang sa FIBA Qualifying Round isip usa ka international tournament kay klarong mahatagan pa siya og igong playing time ug mas makapakita sa tinuod niyang linabokan ug nakat- onan sa hapit moduha ka tuig niyang ensayo kontras mga Merkano. Kining hitaboa, walay kalahian niadtong mao pay pag- abot niyas Amerika nga angayng mag- NCCA una sa dili pa mamasin sa NBA. Usa gihapon ka dakong risgo sanglit kon ibutang tang mapaslak siyag usa ka dekalidad nga koponan apan dili magamit, walay gihapon siyay tsansa. Apan kon mahiluna og team sa Division II, tinuod makawadwad siya og maayo apan samot nga layo sa paglaom sanglit segunda ra man ni nga liga sa collegiate. Dili usab mawala ang posibilidad nga, tinuod dili man maot gayod o maayo kaayo modula si Kai, apan lagmit tambilagaw pa lang gyod ang iyang hiyas ug dili haom sa gikinahanglan niining bag- ong henerasyon sa basketbol karon. Maingong pu’nga anaa na baya sa laing lebel ang bayhon kining dulaa busa dili gayod masayon ug malisod tugkaron. Nan karon, sanglit opisyal na man nga misimang ang dalan ni Kai, ang kataposang pangutana, asa na man kaha diay siya padulong? Mas labing duol mao ang pagpanikaysikay na lang sa Uropa sa pamasin nga may makahablon pa kaniya. Sanglit kon maayo lang iyang dayak, dili usab baya matabas- tabas ang mga ngalan nga gikan ning ligaha nga anaa ug nahimong mga superstar sa NBA niining mga adlawa. Hinuon, ang labing tinuod mao nga dili na ingon ka mait- on na gyod nga salapi ang nagpaabot komparar sa recruitment kapin sa tuig ang nakalabay. Laayo na kaayo ang NCCA collegiate kay napaso na man ang amateur status ni Kai Sotto human makapirma og kontrata sa Ignite. Atong usbon, asa na man kaha diay siya mopaingon? Para nako, ang labing sayon mao nga puydeng mopadayon siya sa pag- eskuyla aron mamahimong kinataasan nga abogado, engineer, doktor, o kaha seaman gayod. Sunod, siyempre, walay laing padulngan kondi mag- PBA ( akong taganon, mag- SMB)— aron sama ni Junmar Fajardo, maghimo og kongkretong ngalan sa kalibotan sa basketbol nga Pilipinhon. Sige na lang, bata pa si Kai ug aduna pay daghan ug mas sanag nga adlaw nga nagpaabot. Kay dili man iya karon, basig ugma. Kining maong hitabo ibutang na lang isip ‘ tsards to eksperyens.’ Ug karon gyod mismo, ang labing maayong buhaton mao ang paghunong una, mopahuway ug mamalandong. Dayon himoon ang unang lakang pagmatuod sa butang nga gusto niyang ipamatuod. Oo, “liti lang ang walay balos.” Salamat sa pagbasa. (KATAPOSAN)

Images:

© PressReader. All rights reserved.