Kahuyang

KON sukdanan pa sa pagka lalaki ang pag-angkon og kaisog diha sa pagtuman sa usa ka lisod nga laraw, nan, gapatigbabaw gihapon ang tinuod natong sekswalidad tungod sa imong gipakitang kahuyang karon. Lapas kanapulo ka na man tingaling gasigeg sulod-gawas dinhi sa kuwarto, motabang kunohay kang Ellen sa pagimpake dayon magpakaaron-ingnong adunay kuhaon sa kosina o di ba kaha sa sala unya mobalik na sad nga wala diay bitbiton, motutok lang makadiyot sa gakisdom nga wanang samtang magpangapkap sa ring box diha sa imong bolsa apan walay pulong nga malitok kay ingon sa nalambod imong dila.

Sukad pa sa miaging gabii dihang giduaw ka ni bespren Mark, nga bag-ohay lang naabot gikan sa Australia, natarog imong kalinaw, nahagit imong kasamtangang estado kay, sumbong mo pa kanako, gihasol imong galamhan sa iyang mga gipamulong labaw na kadtong You’re not the Kevin that I used to know. Ang Kevin nga akong nailhan isog ug gawasnon…

Ganina ra nakamatikod imong uyab sa imong pagalindasay apan wala lang ka niya panumbalinga kay nabisi man kini sa paghapnig og balik sa mga sinina ug ubang mga gamit sulod sa duha ka dagkong maletang maoy dal-on niya paingon sa Qatar sunod semana. Gipanghabwa ug gipangusab niya ang pagkahimutang sa iyang mga gamit, tataw nga wala kini makauyon sa gibuhat nimong paghan-ay. Daw bata kang gikasab-an ni Ellen kay niya pa Nganong wala na man lang nimo lukota ning mga sinina? Ka’s kaayog space, oh! Wala gyod kay initiative, uy! samtang gisugdan niyag rolyo ang mga biste dayong suksok sa matag ngilit sulod sa dagkong maleta.

Ganihang buntag, samtang aduna siyay gihikayng importanteng papeles, gimandoan ka niya sa pag-impake. Saksi ko giunsa nimo pagpugos imong kaugalingon sa pagbuhat niini kay bug-at man kini sa imong buot, apan lagi mando man sa imong girlpren, wala na kay laing mabuhat kondi ang pagtuman.

Kevin, unsa pa may imong gipaabot? Nganong sige ra man kag pangapkap sa box sulod sa imong bolsa? Nganong dili mo man kini lahosog kuot aron ipakita kang Ellen ang singsing? Ayaw ko ingnang gitaptan na pod ka sa kahuyang? Wagtanga na imong pagduhaduha ug kahadlok aron bisan karon lang mapamatud-an nimo niyang aduna pod kay kapasidad sa pagkontrolar sa inyong relasyon, nga dili lang ka itoy-itoy kanunay sa imong uyab, pu’ng pa ni bespren Mark.

Sayod kong dili lalim ang imong naagian karon. Kanunay kang mosumbong kanako, makighinabi kon walay laing andam maminaw sa imong mga yangungo. Gisuginlan ko nimo sa tanan bisag gikuwadro ko dinhi sulod sa picture frame nga gisab-it sa bungbong sa inyong kuwarto. Kay ako ikaw ug ikaw ako. Ako ang imong kanhing pagka ikaw sa milabayng katuigang gipatunhay sa usa ka letrato. Ako ang desiotso anyos nimong kaugalingon. Ug bisag baynte singko ka na karon, dili mahimong mahikalimtan nimo ang miagi nimong pagka ikaw. Tuohi nga sa matag higayong suginlan ko nimo sa imong mga suliran, misuway baya kog pabati sa akong tingog aron ipaambit ang akong mga tambag. Sama karon. Hinuon, sayod kong dili ko nimo madunggan. Diha sa imong kalibotan, imposible nimong mabati ang tingog sa karaang pagka ikaw nga gibilanggo niining larawan.

Tingali susama ra pod kitag gibati, Kevin. Sa daghang higayon daw binilanggo usab ang mga pulong diha sa imong

baba kay ang kahuyang o kahadlok ba kaha kanunay mang mopatigbabaw kon ugaling buot nimong ipadayag imong mga tinguha diha sa inyong relasyon ni Ellen. Ug kon mabuntog man gani nimo ang maong kahuyang ug kahadlok, kanunayng bungol man sad imong uyab sa imong mga ipamulong.

Buot na unta nimong motingog apan padayon gihapon siya sa pagyawyaw nga Tan-awa ra god ning imong gibuhat sa akong mga medyas! Puyde ra man god ni nimo isuksok ang usa sa iyang kapares unya rolyohon! Gipakita niya nimo ang maong proseso naingog usa ka maestrang galektyur sa iyang tinun-an. Hinuon, maestra man tuod siya. Walo na pod siya ka tuig nga galunodpatay sa pagpanudlo sa lainlaing ESL schools dinhis Cebu una makahukom nga manimpalad sa laing nasod. Ug ning bagohay lang lagi, nasayran nimong lumargahay na siya paingon sa Qatar.

Sa kataposan, taliwala sa kasamtangang pagsibya karon ni Ted Failon diha sa inyong flat screen TV kabahin sa pagpiyait sa grupong Gabriela batok sa giingong laing malisyosong pamahayag na pod ni Digong nga sa ilang tan-aw miyatak sa dignidad sa kababayen-an, nadungog kong may pulong nang migawas sa imong baba kay gisampit man nimo si Ellen gamit imong endearment kaniya. Apan tungod kay naingon sa usa lang ka hunghong ang paglitok mog “boss” maong gitukob ra dayon kini sa kabanha gikan sa TV. Padayon lang gihapon siya sa paghapnig nga matag karon ug unya magpanglingo-lingo ug magpanakla.

Boss, utang buot paminawa ko! tuaw mo. Nahiundang si Ellen sa iyang gibuhat kay hugot nimong gikuptan ang iyang mga bukton. Maskin ako, Kevin, nahikurat sa imong gibuhat. May katingalahang puwersa sa imong pagkupot. Segurado kong bag-o kini sa pamati ni Ellen kay naandan na niya ang kalumoy ug kayusyos sa atong linihokan. Nagtangag kinig pagagni ug katigson daw adunay taliulbong rebolusyon.

Daw natuk-an si Ellen sa iyang nadungog kay sa kataposan miingon man kang Ayaw na lang paglahos sa Qatar, please!

May kasagmuyo ug kahasol nga mianino sa iyang panagway. Kanang matang sa ekspresyon nga sagad na natong mabasa sa nawong sa imong girlpren matag higayon nga aduna kay isugyot o di ba kaha ipamugos nga klarong ikatutol niya.

Ang kalibog pagpangita sa kaugalingon nga misangpot sa daghang kalibog...

Mahisangpot kini sa mga panaglalis nga sa kanunay ra ba si Ellen ang magmadaogon. Pero sa ato pang gipanghinaot, dili na unta karon. Ipagawas na ang gitigom-tigom nimong kaisog, Kevin, bahalag pakyas ka kaganiha kon mao man gani kini ang sukdanan sa atong pagkalalaki tungod sa imong gibating kahuyang. Dugay rang gidawat ni Ellen ang tinuod natong sekswalidad, ang atong pagka kita, maong walay angay ikabalaka. Aduna ba?

Namarayeg ang imong tingog sa pag-ingon A-ayaw lang ko biyai, Boss. Di nako makaya ang long-distance relationship dayong sapaw ni Ellen nga Kevin, grow up! samtang misamot ang pagpangunot sa iyang agtang ug gasugod na man ganig tagbo iyang mga kilay. Usa sa mga hinungdan nganong mawagtangan dayon kag umoy kon ugaling aduna moy panaglantugi kining kapiho ug kabagtok sa tingog sa imong uyab. Bisan ang yano niyang sinultihan adunay gikusgon ug gibug-aton ang tonada hinungdan nga usahay maalaan siyang lakin-on sa uban.

Aduna kiniy gihulbot nga libro gikan sa giagup-op ninyong bookshelf ubos sa TV ug gilakip niya kinig sulod sa iyang maleta. “The Awakening” ni Kate Chopin. Di ba kini ang nobelang pirmeng balik-balikog basa sa imong uyab? Kini usa pod sa imong mga paborito kaniadto pa lang nga napuno pa man gani ang mga pahina niini sa imong mga anotasyon, mga reaksiyon, ug mga komento sa dagan sa naratibo o di ba kaha sa pilosopiyang gisamin niini. Sa gidaghanon sa imong koleksiyon, sagad mga nobela, nga daw gitan-ogan lang nimo sulod sa dugayng katuigan kay wala na man gyod ni nimo mahilabti, kini ang bugtong librong gipangayo ni Ellen nimo ug dal-on pa man gani niya sa Qatar karon. Kontrobersiyal gihapon alang nato kon giunsa pagtapos ni Chopin ang iyang nobela diin maskin man gani silang mga kritiko hangtod karon nabahin pa gihapon kon unsay tinuod nga kahulogan sa kamatayon (o kon nagpakamatay ba kaha hinuon) ug kon naangkon ba gyod ni Edna Pontellier, ang babayeng protagonista, ang gitinguha niyang tiunayng kagawasan diha sa sabakan sa dagat.

Mipadayon siya sa pag-impake, gipahiluna ang gipangrolyo nga mga underwear sa kompartamento sa iyang maleta unya miingon Hangtod karon ba dili gihapon nimo masabtan? I’m doing this for us! Mibawos ra ba dayon ka sa pagtubag og

For us? Gitago nimo nako ang tanan! Kon wa nako makit-i imong plane ticket sa miaging adlaw, di unta ko masayod nga lumargahay na diay ka. I was never part of this plan from the start! You’re only doing this for yourself!

Kevin, buot ko ikawng abibahan! May kahait sa imong gipamulong nga segurado kong nakatandog karon sa balatian ni Ellen, miduslak sa iyang garbo. Walay gikatumbas ang solidong tingog niining lalaking reporter nga karong puntoha nagataho sa giluwat nga pamahayag sa grupong Gabriela.

Kini ang unang higayon nga walay gikatugbang si Ellen nimo. Dawata akong pahalipay sa imong gamayng kadaogan!

Dihay gil-as nga kahilom nga mipataliwala ninyong duha bisan pa man sa kabanha sa palibot. Ikaw ra pod ang miwalis sa maong kahilom sa pag-ingon Sorry, Boss…Okay? kay buot nimong am-aman imong uyab— butang nga kanunay nimong buhaton matag higayong aduna kay masulti nga makapasakit niya. Namarayeg na usab ang imong tingog samtang nangutana Boss, nganong mo-abroad pa man ka? Okay ra man ta diri, di ba? Hapit na ko ma-promote pagka teamlead. Motaas na unya puhon akong suweldo…

Naanad na si Ellen sa natural natong tingog nga molubad ug mobawog labaw na kon mamarayeg. Parte kini sa atong pagka kita nga gidawat na niya sa sinugdanan pa lang. Maayo lang gani kay nalukop na sa bangas ang tibuok nimong suwang ug apapangig karon. Dili sama nako dinhi sa imong letrato, kaniadtong desiotso anyos ka pa lang, maskulado na imong panglawas karon. Lapad ang pagkaumol sa imong abaga ug dughan bunga sa kanunay nimong pagpulaw sa gym. Maong kon dili ka patingogon, magtuo gyod silang straight ka nga lalaki. Apan si bisan kinsa ang padunggon, dili gayod malimod sa atong tingog, Kevin, ang nagpahiping kamatuoran sa atong pagka kita, di ba?

Mipadayon si Ellen sa nabalda niyang pag-impake unya miingon Nganong lisod man nimo sabton nga I can’t go on living like this? Besides, dili na ko puydeng moatras. Karon pa hinuon? Kahibalo man kang dugay na ni nakong gipangandoy! Gisipiran niya ang usa sa mga maleta ug gikandadohan. Miatubang siya nimo ug ang sunod niyang gibutyag nakapaamang na sad nimog balik kay sayod kong nabati nimo karon nga daw ang mga pulong sa imong uyab liboag usa ka kandadong mibilanggo sa nahuyang nimong paglaom sulod sa imong dughan kay singhag pa niya I don’t want to spend the rest of my life with regrets!

Kevin, hilabihan tingali katulin sa pagdagayday karon sa milabay ninyong kagahapon ni Ellen diha sa imong handurawan nga kon itugot nimong akong sublion maingon nga ang paghandom sa tawo sa mga nangagi niyang kasinatian sama diay kapaspas sa paghalok sa kahayag sa panit sa kalibotan. Ako ang kanhing pagka ikaw usa ka buwan una ta nagkaila ni Ellen, kon nahinumdom pa ka. Ako ang kanhing pagka ikaw nga maoy gasagubang sa kahapdos sa samad sa atong dughan bunga sa pagbiya sa atong eks nga si Rodel.

Kay kon ako pa ang imong pasultihon, Kevin, dili mamahimo nakong mahikalimtan kadtong unang higayong nasabtan nato ang matuod nga kahulogan sa kamingaw, kay mipabilin ug hangtod sa kahangtoran kanunayng magauban kanako, nabilanggo dinhi sa letrato ang mga tipaka niadtong labing dulom nga bahin sa atong kinabuhi.

Nahibalo kong wala ka pa malimot diin nato unang nailhan si Ellen. Aron sa paglingaw sa kaugalingon human ang pila ka buwang pagmaoy ug aron maibanan nato bisag gamay lang ang kangutngot sa atong dughan, usa ka Sabado sa gabii, di ba napugos ta ni Mark sa pagsulod sa Alconautics? Ayaw ko ingnang nalimot ka na sa maong diskohan. Di ba nabantog kini isip lugar-abotanan dinhis siyudad sa nagkadaiyang matang sa mga mahuyang sama nato? Sa mga lantad o mas nailang mga basa (adunay gawasnong nagpadayag sa ilang panamit sama sa mga cross-dresser ug aduna poy uban nga diha sa ilang linihokan ug inestoryahan lang sama ni bespren Mark); sa mga maya nga gikan mitransisyon sa pagka basa paingon sa pagka discreet kunohay sama nako ug ni Rodel (mga bisexual kuno pero lalaki ra diay ang tirada); sa tinuod nga mga tago kun closeted gay (sagad nila nakuryoso ug mieksperimento kay nakasinatig identity crisis, o sa imong kaso kaniadto nga gikan sa pagka maya paingon sa pagka discreet, nakasinatig change of preference tungod kay nasamdan ang dughan); ug sa uban pang kategoriya niining komplikadong espektrum sa sekswalidad. Lainlaing klase apan ang kadaghanan susama lang ang tumong sa pagsulod sa maong lugar: aron mahupay bisan sa makadiyot lang ang unsa mang matang sa kamingaw ug kahaw-ang nga miukiot sa hunahuna, sa kasingkasing, o sa kalag ba kaha.

Lagmit tungod sa gibating kangutngot ug labaw na kay hilabihan pod ang kahubog maong nakadesisyon kita niadtong gabhiona nga mag-usab, mosubay sa saktong dalan (yagayaga pa ni Mark), kay di ba atong nahimatngonan, Kevin, nga mas maayo pang manguyab na lang og babaye kay matinudanon kaysa nilang maya-maya nga sagad adunay daghang kaibid-ibid maong dili takos moseryoso? Tinuod. May dili damhong mga desisyon diay sa kinabuhi ang mabuhat sa tawong hilabihang nagumok sa kamingaw ug desperasyon.

Agig binuang, gisulsolan pod ta ni Mark maong nakigsayaw ta sa usa ka babaye (si Ellen lagi kadto) nga otro sang puwerteng huboga niadtong higayona. Si Ellen ang babayeng atong nafirst kiss! Duha ka semana tang nagkailhanay ug nakigdeyt niya. Ug tungod kay mas magulang nato siya, mao tingaling

nakatagamtam tag kahupayan ug kalingkawasan diha sa iyang presensiya, ug paspas natong nahikalimtan si Rodel. Di ba gidayeg nato ang baroganan ni Ellen, ang mga panlantaw niya sa kinabuhi, iyang mga ambisyon, labaw na ang pagka gawasnon sa iyang kalag?

Hangtod miabot ang takna, Kevin, nga anam-anam kang nakaangkon og bag-ong pagka tawo, nga inanay nimong gibuhian ang pagka ako— kadtong tipik sa pait ug masulub-on nimong kagahapon— kay usa ka buwan sukad mo nagkaila, nakahukom man mo ni Ellen nga himoong opisyal ang inyong relasyon isip manag-uyab. Kevin, segurado kong nahatatak pa gihapon sa imong alimpatakan hangtod karon ang mga gipamulong ni Ellen kaniadto nga Are you sure you want me to be your girlfriend? Kay ako, dawat tika, Kev. I don’t want you to have regrets in the future…

Sa akong tan-aw, naputol ang imong paghanduraw sa kagahapon, ug sama kapaspas sa kahayag, tulin sad kang nahibalik sa pagkakaron. Nadungog ba kaha nimog balik ang lawom nga tingog ni Ted Failon nga niining tungora nagataho kabahin sa pagpadayag sa grupo sa mga student leaders gikan sa lainlaing unibersidad sa Kaulohan sa ilang suporta sa SOGIE Equality Bill kansang pagpasar gaung-ong pa gihapon sa Senado? Wala na tingali kay pag-alinga sa palibot kay gipangutana mo man si Ellen nga Gamahay na ba ka karon sa atong relasyon, Boss? unya dayon siyang mitubag og Stop being childish, Kevin! Daw nabati nako ang pagbuto sa giluomluom nimong pailob kay miisa pa man gani ang imong tingog nga gakurog ug gabawog-bawog samtang gipabuhagay nimo ang Mao na! Mao nay pirmeng tan-aw nimo nako! Childish, immature, way kuwenta! Mao nang imong desisyon kanunay matuman sa atong relasyon! You’re always in control! Why? Tungod ba kay mas manghod pa ko nimo? O tungod ba kay bayot ko?!

Dihay katim-os likod sa kabakikaw sa paglitok sa kataposan nimong pangutana ingon sa adunay kamatuorang dugay nang gitipig-tipigan ang wala makaagwanta ug nakaikyas gayod sa imong tutunlan. Mibanda-banda karon ang gil-as nga kahilom sa matag suok sa inyong kuwarto.

We can no longer stay silent on the issue of discrimination! ang kusganong pamahayag sa usa ka estudyanteng aktibista. Asoy pa sa reporter nga plano dawng motambong niining grupo sa mga tinun-an sa mga rali nga dungang ipahigayon sa piniling mga siyudad sa nasod agig suporta nila sa kawsa pagagni sa Senado aron aprobahan ang balaoron sa SOGIE Bill.

Ug gamit tanang nahabilin nimong kaisog, sa kataposan gikuot mo ang ring box gikan sa imong bolsa. Gibuhat mo tingali kini aron dili masaksihan ni Ellen ang usa na sad ka matang sa imong kahuyang kay gahulga bayang mangatagak imong luha. Usahay maangkon sa tawo ang kaisog diha sa pagluom ug pagtipig sa iyang kahuyang. Ug usahay sad kinahanglang magpakaaron ingnong maisogon aron luwason ang kaugalingon sa hinanaling pagkahugno. Busa, imong gipatong ang ring box sa side table tupad sa letrato ninyong duha ni Ellen. Gilantaw sa imong girlpren kansang mga mata napunog mga pangutana ang maong butang. Ug sa walay paglingi-lingi migawas ka dinhi sa kuwarto.

MAGTUNGANG gabii na lang, wala gihapon mo duawa sa katulogon ni Ellen. Unsaon man daw p agkatulog sa duha ka kasingkasing nga gaalindasay? Gatalikdanay mo sa paghigda sa inyong kutson, ang gintang sa inyong mga bukubuko lapad nga wanang sa kahilom, naputos og kangutngot sa di malitok ninyong mga pulong.

Nasabtan ko ang imong gibati karon. Sayod ko unsa kamakahahadlok sa naghinangat nga pagbiya ni Ellen. Nahadlok ka sa kamingaw sa unahan. Pero, Kevin, ang tinuod, hain man gayod ang labi nimong gikahadlokan: ang kamingaw sa pagkawala sa pisikal nga presensiya sa babayeng imong gikauban sulod sa dugay nang katuigan o ang kamatuorang pakyas gihapon ka sa imong tinguhang ipatigbabaw ang imong “pagka lalaki” diha sa inyong relasyon kon ugaling ang iyang pagbiya dili gayod nimo mapugngan?

Tingali ang kahadlok sa maong kamatuoran mao usab ang gatukmod nimo kaganiha aron sa kataposan mapakita nimo kang Ellen ang singsing timaan sa paghanyag nimog kasal kaniya. Kay basin diay, sa ato pang pangagpas, mao kini ang makapugong niya sa paglarga kay gikuptan man nato ang gipamulong ni Ellen adtong usa ka gabiing gaestorya mo sa dayon ninyong pagkatulog nga Maningkamot gyod kong maka-abroad. Nothing can stop me from pursuing my dreams puwera lang gyod tingali if minyoan na ko o mapabuntisan ba kaha nimo. Simbako! Gimahayan mo seguro karon, Kevin, ang imong pagpakamenos ug pagkompiyansa sa gahom sa determinasyon ni Ellen nga makab-ot ang iyang mga pangandoy.

Dili man bag-o kang Ellen ang hanyag nimong pakaslan siya. Dihay ubay-ubayng sinulagmang higayon nga mahisgotan ninyo sa imong uyab ang plano nimong minyoan siya ugma damlag. Apan di ba tiaw-tiaw lang ang tanan alang kang Ellen kay dayon man ka niyang kataw-an o di ba kaha likayan niya ang maong hisgotanan kay lagmit nakamenos sa imong katimos ug kaikag?

Mibakod ka ug milingkod kilid sa kutson. Gilingi nimo si Ellen kansang likod daw nasusamas usa ka blangkong pahina sa libro. Maskin ako, Kevin, nasayod nga gamata pa imong uyab hangtod karon. Sama nimo, nakuryoso pod ko kon unsay kasamtangang gadagan sa iyang hunahuna. Dawaton ba kaha niya ang imong gihanyag nga kaminyoon? Molahos ba gihapon kaha siya sa paglarga sunod semana?

Kaganiha, naabtan nimo siyang hilom nga gahigdang gatakilid sa dihang mibalik ka sa inyong kuwarto human ka magpahungaw sa imong gibati gawas sa inyong apartment. Kevin, unsa pa may imong gihuwat? Alam-alami nag balik si Ellen sama sa imong naandang buhaton. Pasabta siya sa imong gitinguha. Walay luna ang garbo sa inyong kahimtang karon. Hinuon, dugay ko nang nasuta nga dili garbo o unsang matanga sa pakigbisog ang hinungdan nganong buot nimong supilon ang pagdominar ni Ellen sa inyong relasyon kay matod pa nimo usa ka higayong nakighinabi ka nako Basin tungod sa akong kahuyang kaniadto maong gibiyaan ko ni Rodel… Tingali sakto ka sa imong pamasin. Di ba gitugyan nato ang tanan kang Rodel kaniadto? Gipasalig nato kaniya ang matag desisyon ug gipasagdaan siyang kab-otong nag-inusara iyang mga pangandoy. Nagpasagad ta ug mikompiyansa hangtod nga nawagtangag direksyon ang maong relasyon. Ug usa ka adlaw, kalit lang siyang nahanaw.

Human sa taudtaod nimong paghinuktok, gipunting nimo dayon imong panan-aw kanako. Taliwala sa nanihag-sihag nga kapus-aw sa kahayag gikan sa lamp shade, nakita ko ang tumang kalibog ug kabalaka diha sa imong mga mata. Ayaw ko ingnang mosibog ka sa imong tinguhang pakaslan si Ellen, nga dili nimo siya pugngan sa iyang paglarga? Ayaw ko ingna, Kevin, nga buhaton mo ang gisugyot ni Mark? Ayaw ko ingnang makigkita ka kang Rodel?

Kay butyag mo, gisultian ka ni bespren Mark sa miaging gabiing miduaw siya nga mikontak daw niya si Rodel sa messenger, nangayog tabang sa pag-agni nimo aron mosugot kang makigkita niya. Pasabton kuno ka sa imong eks-boypren sa iyang tinuod nga hinungdan nganong kalit lang siyang nahanaw ug mibiya. Usa ba pod kini sa mga rason nganong hilabihan ang imong pag-alindasay sukad pa kagabii? Di ba gikataw-an lang nimo ang gisugyot sa atong bespren nga Why don’t you give him a chance, Best? Once and for all, paminawa kon unsay iyang mga rason. Basin diay duna kay madiskobrehan sa imong past nga mapahimuslan nimo sa pagkakaron kay para nimo wala nay pulos iyang mga hinungdan, labaw na karong

aduna na kay bag-ong kinabuhi uban kang Ellen nga desidido na man gani kang pakaslan siya.

Gitug-anan sad nimo atong suod nga higala nga sa tulo ka higayon pod kang personal nga nakadawat og mensahe gikan kang Rodel ug hagbay ra nimo kining gi- block sa facebook ug sa messenger aron dili na ka niya samokon. Dugay ra sad nimong gipahibalo si Ellen mahitungod sa mga mensahe sa imong eks kay lagi nagmatinud-anon ka sa inyong relasyon. Hinaot imong seryosohon, Kevin, kadtong iyang walay pugong-pugong nga pagbahad nga Naa ra nimo kon makigkita ka niya! Tan-awon ta lang kon naa pa kay balikang uyab! Dili kadto tiaw-tiaw, di ba?

Mibarog ka gikan sa imong paglingkod kilid sa inyong kutson. Miduol ka sa akong atubangan ug mitutok nako sa hilabihang kalawom ug kamaduloton. Naingon sa gipanamin mo ang karaang ikaw. Sa imong paglantaw, gitaytayan mo ang kagahapon ug ang pagkakaron. Gisusi mo ang matag pulgada, ang matag pihong detalye sa akong dagway— ang kanhi mong panagway, ang kanhi mong kailhanan— hangtod nagkatagbo ang atong mga mata ug inanayng mituhop lagbas sa akong kalag ang imong pagtutok daw gipanamin ko diha sa imong mga mata ang susamang kasub-anang dugay ko nang ginasapnay.

You seem so happy and content right now, Best! maoy komento nimo kang Mark sa miaging gabii, di ba?

Pagkasayod nimong nauli siya sa Cebu, giimbitar nimo siya dayon dinhis apartment kay gawas nga gimingaw na ka niya, nagkinahanglan pod ka sa iyang tambag kabahin sa imong planong paghanyag og kasal kang Ellen. Magtulo na pod ka tuig nga wala mo magkakita ni Mark kay gikuha man god siya sa iyang Awstralyanong boypren ug sa miaging buwan lang gyod gipakaslan didtos Australia. Tug-an mo pa kanako, mas nagmalipayon ug mas nagmatagbawon karon si bespren Mark sa iyang bag-ong kinabuhi kay nanghambog pa man gani kini nga Of course, Best! I just got married and my husband is very supportive of me. When I told old him nga gusto nako nga diri mi sa Cebu mag-honeymoon, walay lay libog ang karaho, uy, misugot ra man sad dayon…

Samtang galitanya kagabii abii atong suod nga higala sa iyang kinabuhi didtos Australia, sa tinubdan sa iyang tiunay nga kalipay ug sa bag-ong nakab-ot ab-ot nga kagawasan, tingali mikilab diha sa imong panumdoman an ang nangaging mga kagahapon ninyo ni Ellen: kadtong una na ninyong dakong away atol sa inyong first anniversary nga a usa ka semana mong gabungol tungod lang kay wala siya makauyon sa gisugyot nimong restawran (dili kuno praktikal ikal alang niya nga magsaulog mo sa inyong espesyal unta nga ga adlaw sa maong mahalong lugar); kadtong gipugos ka ni Ellen en nga mobalhin og kurso gikan sa AB Literature paingon sa BS Nursing kay, para niya, mas daghag oportunidad labaw w na sa gawas sa nasod ang naulahi bisan og hilig unta a nato ang pagpanuwat ug pagbasa, apan kay lagi si Ellen man ang halos gasuporta sa imong pag-eskuyla sukad mo nagkauyab ug matod pa niya wala kay kaugmaon sa a maong kurso, maong wala kay nahimo himo (hinugdan nganong wala ka kagradwar sa kolehiyo ug sa call center hinuon ang imong gidangatan); kadtong nasakpan nimo si Ellen nga dugay ra diay siyang sekretong nagatomar og mga kontraseptibo bisag ganahan ug andam na baya unta kang makabaton n og anak; ug ning bag-ohay lang nimong nasayrang hilom nga pagpangaplay ni Ellen og trabaho sa Qatar ug lumargahay na lagi kini sunod semana.

Tug-an mo kanako nga kalit lang nausab ang baroganan ni bespren Mark ug dili na daw siya mosuportar sa plano nimong pagpakasal kang Ellen sa dihang wala dayon nimo matubag kadtong iyang pangutana kagabii nga Don’t tell me you’re not happy anymore, Best? kay bisag pila na pod ka tuig mong wala magkita, matod pa niya, dili daw puydeng mawagtang iyang abilidad sa pagbatyag kon unsay tinuod nga gibati sa iyang labing suod nga higala. Ambot unsang matanga sa kahimatngon ang misantop sa iyang hunahuna kay giagda man hinuon ka niya sa pakigkita kang Rodel sa Alconautics kay niya pa lagi Ang Kevin nga akong nailhan isog ug gawasnon…

Miduol ka sa side table. Gipunit nimo ang ring box nga karon sa akong tan-aw ugtok pa sa nagpangintong kahilom sa kagabhion. Giablihan nimo kini. Gitutokan nimo sama kamaduloton sa pagtutok nimo nako kaganiha ang duha ka singsing nga maoy mosimbolo unta sa inyong kaminyoon ni Ellen. Gilantaw nimo ang nahimutangan ni Ellen kansang hunahuna, sama sa imoha, padayon gihapong gihasol sa pagalindasay ug kaaliwaros. Kevin, larawan ka karon sa usa ka linalang nga nahubsan na sa paglaom kay lagmit anaa ka na man karon sa utlanan sa imong kahuyang.

Unya, giuli nimo ang ring box gikan sa iyang nahimutangan ug paspas kang gailis sa imong sinina.

MAGTULO na pod ka semana ang minglabay sukad nahilarga si Ellen padulong Qatar. Magtulo na pod ka semana kang naginusara. Bisan ang paghanyag nimog kaminyoon sa babayeng imong nakat-onang higugmaon wala gayod makapugong niya aron tumanon iyang pangandoy. Karon, nahigmata ka tapad ang usa ka bul-og sa kahaw-ang diha sa inyong higdaanan. Ug sa pagmata nimo, sama sa nangaging mga higayon, moduslak ra ba dayon ang makasamad nga kamingaw samtang ang imong hunahuna daw libod-suroy diha sa imong pagduhiraw.

Matod mo, Kevin, gitago mo ang kahuyang sa imong dughan niadtong gihatod nimo si Ellen sa erport. Dili mo buot nga ang imahen sa imong pagkahugno maoy pagabawnong handomanan sa imong uyab sa iyang pagbiya maong gipugngan nimo ang kaugalingon, kutob sa mahimo, nga magpakiluoy, labaw na gayod ang mohilak.

Nakatabang seguro aron

magmaisogon ka sa paghangop sa maong hapdos nga kamatuoran ang gipamulong ni Rodel niadtong gabiing nakadesisyon kang makigkita niya sa Alconautics nga Bisag lisod sabton, apan usahay biyaan ta sa atong hinigugma aron maangkon nato ang kaisog sa pag-inusara…

Gisuginlan ko nimo sa tanang nahitabo niadtong gabhiona. Kon wala pa mamatikdi ni Rodel nga kasukaon na ka tungod sa nahurot nimong lima ka botelyang Red Horse, dili unta mong duha moundang og sayaw sa dance floor taliwala sa gapunsisok nga mga tawo— tanang matang sa mahuyang— kansang singot, pahumot, gininhawa, kainit, biga nagkalandrakas, mihungaw ug misagol sa mabulokong mga dagitab, mibanda-banda duyog sa makabungol nga tugtog ug ritmo diha sa gadilaab nga langitnong himaya sulod sa Alconautics.

Human nimo isuka tanang nainom, gipabuhagay pod nimo tanang pagbating mibagtok sa imong dughan nga gipugos mo man unta sa paghikalimot sulod sa katuigan hangtod nga nalup-og ka ug midanguyngoy atubangan ni Rodel, mitugot sa imong kaugalingon nga mapadayag ang gipanalipdang kahuyang nianang gabhiona. Taliwala sa pakiglayog sa imong panimuot batok sa gahom sa kahubog ug kalipong, lagmit nagpabilin gihapon ang espiritu sa beer sa imong galamhan kay matod mo ingon sa gabanda-banda gihapon ang tugtog sa diskohan sulod sa imong ulo, bisan og anaa na kamong duha ni Rodel niadtong higayona gawas sa Alconautics, gapuk-ong sa may parking lot. Gisuginlan ka sa atong eks sa tinuod nga hinungdan kon nganong iya tang gibiyaan. Apan nasabtan ko ikaw, Kevin, kon nganong ingon sa gipalapos mo lang ang tanan niyang gipamulong sa pikas dunggan— walay bisan unsang klase sa ilimnong makahubog o unsang matanga sa kabanha ning kalibotana ang makapalipong ug makapanas sa kamatuoran— kay dugay ra man natong nasayran ug gituohan ang maong hinungdan. Gani, nahiundang si Rodel sa paghinubay sa tinuod niyang rason kay, matod mo, kusog kang mibuhakhak, ingon sa nalisoan sa maayong pangisip. Apan sayod kong wala ka gayod mabuang niadtong higayona, Kevin. Nagmadaogon tingali ang imong panimuot batok sa gahom sa kahubog kay nimo pa Do you think I’m this stupid not to know the real reason? nga gitubag ra ba ka ni Rodel og Then nganong nakigkita man ka nako karon?

Kevin, tuohi ko sa pag-ingon nga kalit dihay nangapusgay sulod ning akong dughan— mga pagbating dugay nang mibagnol, mga emosyong dugay ko nang ginasapnay dinhi uban kanako sulod ning kuwadradong kalibotan— sa dihang nadungog ko gikan nimo ang Maybe I just wanted to do the bravest thing. Once and for all, I just wanted to prove something. Kang Ellen… nimo… sa akong kaugalingon. Nga aduna pa koy nahabiling kaisog…

Mibakod ka gikan sa higdaanan aron sagubangon na sad ang laing gakisdom nga kagabhion. Alas siyete na sa gabii. Ingon arong orasa motawag nimo si Ellen sa messenger. Ingon arong adlawa nga rest day nimo. Ug tuod man, aduna nay lima ka unanswered video calls gikan kang Ellen nga mirehistro sa screen sa imong selpon. Sukad sa iyang pag-abot sa Qatar, makadaghang higayon na sad ka niyang gisuwayag tawag aron lagi pangomostahon, luwason ang inyong relasyon sa hingpit niining pagkahugno, apan pakyas siya sa tanang higayon nga mahinabi ka. Wala nimo replayi maskin usa sa iyang mga mensahe nga ang kataposan pa man gani nagkanayon nga I respect your silence, Kev. I’m giving you time and space for now.

Susama sad ang kataposang mensahe sa messenger ni Rodel kansang mga tawag bisag usa tuyo nimong wala panubaga. Nagmahay ka tingali kon nganong gi- unblock nimo siya sa facebook human ang paglarga ni Ellen, apan eksplinasyon mo, hagbay ra man nimong nabuntog ang kahuyang niadtong gabiing nakigkita ka niya sa Alconautics maong wala nay rason aron likayan mo hangtod sa kahangtoran ang usa ka tawong kabahin na sa pait nimong kagahapon. Tinuod, labaw sa tanan, oras ug espasyo ang imong gikinahanglan. Butang nga gikabalak-an pag-ayo ni bespren Mark labaw na nga mobalik na sila sa iyang bana sa Australia sunod adlaw.

Gi- on nimo ang TV ug misugat gilayon nimo ang balita kabahin sa bag-ohay lang gipahigayong “Metro Manila Pride March.” Unsa kahay misantop sa imong hunahuna karon samtang gasud-ong ka sa liboan ka membro sa LGBTQ+ community nga misalmot sa maong lapad nga kalihokan agig pagsuporta sa ilang kolektibong kawsa? Bisag mibunok ang uwan, nagmasanagon baya gihapon ang panagway sa matag usa nila, inundakan pa sa kamabulokon sa ilang gipangbitbit nga mga payong ug sa giwara-warang mga banderang naila nang simbolo sa atong sektor ug sinonimo na sa atong pagka gawasnon. Apan gawasnon ba gyod kitang tanan, Kevin?

Gipalong mo ang TV. Sa dihang padulong na unta kang mogawas dinhi sa kuwarto aron mamahaw, wala tuyoang nasangit ang imong panan-aw sa usa ka pamilyar nga libro sulod sa bookshelf. Gikuha nimo ang maong libro ug lagmit agig pagsuta ug pagkompirmar, gipakli-pakli nimo ang matag pahina niini. Wala gayod kita masayop sa atong nakita. Ang nobelang “The Awakening” gayod kana nga kahinumdoman natong gilakip man untag sulod ni Ellen sa iyang maleta!

Dihay kalibog nga mimarka sa imong dagway kay lagmit imong nakita ang karaan nimong mga anotasyon diha sa mga pahina nga nagpamatuod lang nga kini mao gayod mismo, walay lain, ang nobelang gipangayo ni Ellen ug plano pa man gani unta niyang dal-on sa Qatar.

Ug karon, gatangag tingalig usa ka matang sa kahimatngon ang anotasyon diha sa hinapos nga pahina sa maong libro kay mikaging man ka samtang gabasa. Nagduda ko nga kang Ellen kana kay wala koy mahinumdomang misuwat ko sa akong reaksiyon o komento ba kaha kabahin sa kon giunsa pagtapos ni Chopin ang iyang nobela. Kay sama ni Edna Pontellier nga mihubo sa tanan niyang sapot, misawom sa dagat, hangtod nga nakabsan sa iyang kusog ug gipasagdan na lang nga sapnayon iyang lawas sa mga bukton sa lawod, gipasagdaan ko na man lang sad, sukad kaniadto hangtod karon, nga magutaw-utaw ang naangkon kong kahimatngon ug pagtulun-an gikan sa maong sugilanon taliwala sa lapad nga lawod sa akong handurawan.

Gipunting mo ang imong panan-aw sa ring box nga magtulo na pod ka semanang naamang, wala matandog ibabaw sa side table. Apan karong higayona, dako nakong katingala, kay sa kataposan gipunit mo man kini ug giablihan. Gitutokan mo sa tumang kalawom ug kamaduloton ang duha ka singsing ug anam-anam nga nagmasanagon ang imong panagway ingon sa dihay namalik nga tam-is-hapdos nga mga kasinatian gikan sa kagahapon! Human sa maong mubong kahilom, giablihan mo ang drawer sa side table ug maampingong gipahiluna ang ring box sulod niini.

Ug dinhi sa akong nahimutangan, Kevin, nakita nakong dihay misanag nga bag-ong matang sa kagawasan diha sa imong dagway! Dihay misubol nga bag-o nimong pagka tawo human ka nahimagta sa usa ka lab-as nga kamatuoran ug dayong mibuswak ang gauylap nga kaisog sulod sa imong dughan! Mipatigbabaw ang tinuod nimong pagka tawo— ang imong pagka ikaw— ingon sa walay bisan unsang matang sa kalibotanong sukdanan ang makabalit-ad sa iyang pagka tinuod.

Gisunod mo dayon pagpunit ang imong selpon ug aduna kay gitawagan sa messenger. Ug human sa pipila ka segundong pagpaabot, nadungog nako ang paraygon mong tingog sa pagingong Komosta na…? (KATAPOSAN)

DUHA ang napilian ni Conrad nga padulngan pagkahuman niya sa kursong political science: mopadayon sa abogasya o moeskuyla gawas sa nasod aron mohuman sa masteral ug doctorate degree. Sa iyang pagtimbang-timbang, mas bug-at ug naikag siya sa ikaduha— ang pagtuon gawas sa nasod. Mao nga misumiter siyag application sa East-West Center sa Hawaii para makakuha ug scholarship grant aron makab-ot ang maong tumong.

Samtang gapaabot siya sa resulta sa iyang application, nangaplay ug nadawat siyang lecturer sa night school sa kursong political science ug philosophy nga inoras ang suhol sa usa ka pribadong kolehiyo. Bisan ang suhol daginoton kaayo, kulang gani sa iyang inadlaw ug personal nga panginahanglan, gidawat niya ang pagka lecturer aron siya malingaw ug makabaton usab og kasinatian sa panudlo. Aron makadaginot, mipadayon siyag puyo sa balay sa iyang mga ginikanan.

Tulo ka oras ang gigahin kaniya— kada Lunes, Miyerkoles ug Biyernes matag semana, gikan sa 6:00-9:00 sa gabii. Tungod kay night school, kadaghanan sa iyang estudyante, aduna nay masaligang mga panginabuhian, ug kaedad o magulang pa niya ang uban; gani sa usa ka klase siya ang kinamanghoran sa tanan. Ang pipila hapit nang mangretiro, gusto lang makatapos ug may mapasigarbong kurso sa dili pa mosalop ang ilang adlaw.

Usa ka gabii human sa klase, pag-atubang ni Conrad humag erased sa mga nasulat sa blackboard, nakugang siya kay may nagpabiling estudyanteng nanampiling sa iyang gilingkoran naglantaw kaniya: si Miss Annabel Clemente.

“Anything, Miss Clemente?”

“Nothing, Sir. Wala lang, nagpabilin ko aron ka ubanan kay sa akong paminaw, ikaw na man lang ang nabilin sa tibuok building. Nabalaka kong biyaan kang mag-inusara kay naa kunoy multo dinhi, duol na ra ba ang Kalagkalag,” mapahiyomong tubag ni Annabel.

“Ayawg kabalaka. Mokaon kog multo! Pero salamat,” matod ni Conrad nga nagkatawa.

“Mokaon… that reminds me nga wala diay ko ka- snack tibuok hapon. Gigutom na ko. Join me to that coffee-pub house by the park. Way balibaray. Ako ang taya. Nakabaligya mig bulldozer ug nakainsured ang akong team og bag-ong natukod nga plywood factory.”

Walay kukaulaw nga gihawiran ni Annabel sa bukton si Conrad ug giguyod kini panaog sa second floor sa Jacinto Colleges. Sa sunod rang block ang pub mao nga ila ra kining gibaklay.

Si Annabel, graduating student sa business management. Bisan sa batan-ong edad nga 25, usa na ka associate partner sa grupong nagpatigayon sa inilang non-life insurance company sa siyudad tungod sa iyang kakugi ug pagka agresibo. Gawas ani, nangulo sad siyag grupo sa sales representatives sa usa ka kompanyang nga namaligyag heavy equipment.

Didto sa coffee-pub house...

“Your choice: coffee, beer or me?”

“I second the motion your choice, Miss Clemente: me. I know you want me, the reason why ania ko sa imong atubangan karon,” tubag ni Conrad.

“Tinuod jod diay ang akong nadunggan. Dili lang bright, witty pa jod diay ka. Wa ko masayop pag-enrol nga elective sa imong kursong political philosophy bisag late na ko. Maayo na lang nadawat pa.

Pero, puyde bang tawgon lang ka nakog Conrad ug Bell nga double ll na lang sad ang imong itawag kanako kon kita rang duha?”

“No prob, Bell nga double ll. Mao man kahay imong gusto. Pero nganong Bell man jod as in kampana sa simbahan nga usa ra may “l” sa Annabel?”

“Aw, kana, suwerte na sa negosyo. A bell rings loud and clear, far and wide. Layo ug daghan ang maabot, makadungog ug maminaw.”

Unya samtang hilom na silang gasalo sa ilang order, si

Annabel wa mamilok daw gilamat nga nagtutok kang Conrad nga diha sa haduol niyang atubangan.

“Ngano man, basin matunaw ko ana? Gikulbaan na baya ko,” tiaw ni Conrad.

“Ambot ngano, unsa ug unsa ni. Sa akong edad, dili na ni matawag nga infatuation. Gawas pa, nakabaton na ko sa duha ka higayon og hinigugma. Wa ko kasabot, galisod kog define sa akong feeling. All I know is that I like you and more than that,” sukli ni Bell.

Hapit masud-ipi si Conrad sa gitungab niyang beer sa iyang nadungog.

FAST forward. Lunes sunod semana, samtang ga- review si Conrad sa iyang lecture para anang gabhiona didto sa lamesang kan-anan sa ilang kosina, miduol ang iyang mama.

“Doy Conrad, naa may nasalaag: guwapa, sexy, wow legs, nangita nimo. Si Bell kuno siya,” pahibalo sa iyang inahan nga mapahiyomon.

“Bell? That rings well. Basta sexy nga guwapa, pasudla. Atong himbisan!” pasiaw sa may pagka pilyong amahan ni Conrad.

“Nasalaag lagi ka, Bell, sa among kabos nga panimuyo,” maulawong timbaya ni Conrad.”

“Gihapitan ka nako kay aron magdungan tag adto sa school.” “Giunsa nimo pagtultol nga suok, daw squatter area man ning among dapit. Di sad ko kadumdom nga naghatag ko nimog address kay wa man say klarong address ning among puluy-anan. Giihap ba nimo kon pila ka ilalom sa silong sa balay ang imong

Dili ila ang panahon. May laing rumbo ang kinabuhi ni Conrad ug managlahi ang pantalan nilang gidulngan...

gisuong, Bell?”

“Ako na god ni,” tubag ni Annabel dalang katawa. “Walay gusto nakong adtoan nga di nako matuoran, ug walay gusto nakong aboton nga dili nako maabot,” sumpay niyang tam-is kaayong nagpahiyom.

Sa manglakaw na sila, mihalog si Bell sa inahan ni Conrad ug paraygong nananghid.

“Mommy, adto na mi. Salamat, ha. Magkita-kita ra tag usab puhon.”

Sa didto na sa kalye, misugyot si Bell, kay landong man ang kahaponon, nga magbaklay lang sila paingon sa College aron magkahinabi sila og dugay. Sa dalan, gisugilon ni Conrad ang kalisod sa ilang panimuyo kay sila bag-ong langyaw sa dapit ug unom silang managsoon. Nga siya working student sa high school ug suwerteng nakatapos sa kolehiyo kay nahimong scholar sa usa ka state university. Ang gipaambit ni Bell mao ang iyang paningkamot, kasinatian ug kalamposan sa pagpanginabuhi bisan wala pa siya kahuman og kurso. “Kayod, determinasyon ug gamayng kaguwapa ang sekreto,” palakbit niya.

Sa kadugayan, nabatasan na ni Annabel nga mohapit kang Conrad bisan sa tinuod tuyoon ang pagbuhat niini kay ang Jacinto Colleges didto man sa sentro sa siyudad unya ang puluy-anan ni Annabel nahimutang man didto sa amihanang dapit ug kang Conrad sa habagatang dapit sa siyudad.

Usa ka higayon, samtang gapaingon sila sa eskuylahan... “Nabasa nako ang review, nindot ng salidang ‘Serendipity’ sa Imperial. Ubanan ko nimo karong Sabado, ha? Sa 4:00 pm showing ta mosulod para tayming; iniggawas nato abri na ang karnabal. Molaag ta didto. Gusto kong mosakay anang habog nga ferris wheel. Unya mag- dinner dayon ta. Didto ta magtagbo sa Coffee-Pub House, okey?” sugyot-hangyo ni Annabel.

Nasagmuyo si Conrad, wala katubag. Namatikdan ni Annabel ang kalit nga pagkausab sa dagway ni Conrad.

“Ayawg kabalaka, akoy bahala. Ayaw kalain. Tagda lang ni nga imbitasyon sa akong birthday celebration, advanced kay sa ikaduha pa mang Sabado moabot. Please lang.”

Wala mopatim-aw si Conrad didto sa coffee-pub nianang pagka-Sabado.

Absent si Bell sa iyang klase sa Lunes ug Miyerkoles.

Biyernes sa gabii, pag-atubang niya humag erased sa mga sinuwat sa blackboard, nakita ni Conrad si Annabel nga naginusara, naglingkod, nanampiling.

“Miss Clemente absent ka sa klase, Lunes, Miyerkoles ug bisan karong gabii. Where have you been?”

“Sa balay ra baya, Sir. Nagpalabay lang sa naghingaping kasakit ug kasub-anan nga wala nako damhang maangkon.”

Dugay ang misunod nga kahilom. Unya mitindog si Bell ug mipaduol kang Conrad.

“Grabe sab nimo, Sir, uy, grabe jod kayo ka. Duha ka oras kong gapaabot didto sa pub, wa jod ka mopatim-aw bisan lang untag usa lang ka segundo aron mamalibad. Sakit kaayo baya, guba akong heart. Abi nimo…” pulong pa ni Annabel nga nabuak ang tingog.

“Sorry kaayo, Bell, giabot kog kaikog, kaulaw. I’ve nothing of worth to share with you. Please understand. Pero mas maayo na lang tingali nga ning tanan nahitabo karon kay sa umaabot pa.”

“I’ve not asked anything from you but your presence. Makita lang ka nako is more than enough. That’s how I feel about you, Conrad. Don’t you understand? Wa koy paki sa giingon mong umaabot.

Ang dughan ania karon, gusbat. Ang kangutngot ania karon, nagpamahit. Naa pa bay molabaw ani sa umaabot?” sukna ni Bell. “Pero di na bali, malabang ra nako ning tanan,” sumpay pa niya, “pero, my dear, sa karon, you cannot escape me, maningil jod kos danyos— compensation, however little, like having a bottle or two of beer at the pub or us strolling together in the baywalk or in whatever way you could before calling it a night, basin rag maulian, maibaniban ang kasakit nga gihambin ning natuliro kong kasingkasing,” panghupaw ni Bell.

“I don’t want to go anywhere. Would a kiss suffice?”

“Tinuod ka?” Misirko ang kasingkasing ni Bell sa iyang nadungog.

Unya hugot siyang gigakos ni Conrad, gihalokan sa ngabil sa mahimayaong gidugayon ug dayon kini mitalikod, nagdukong mibiya nga walay pupananghid ug sa walay paglingi-lingi.

Kalit ang pag-undang ni Conrad sa iyang pagtudlo sa Jacinto Colleges. Wala na kini makita sa tulunghaan sa mosunod nga mga adlaw.

Milabay ang usa ka tuig...

Natagboan ni Annabel ang inahan ni Conrad sulod sa usa mall. Mahinangpanon siyang mihalog niini ug samtang naghapuhap siya sa iyang tiyan, miingon:

“Mommy, amo man unta kini ni Conrad kon nagkasinabot pa lang unta mi. Baby boy ni, Mom. Segurado kong bright ni siya kay bisan sa nanamkon pa lang ko ginganlan ug ginatawag na nako siyag Conrad. Gisultihan ug uyon na ang akong husband nga mao nay iyang ngalan, apan wala siya masayod kon diin nako masindoli ang maong ngalan.

“Misipyat ko, Mom, kang Conrad,” padayon ni Annabel. “Lisod ang pag- penetrate sa iyang dughan. Gawas pa, daw tua siya sa itaas sa pedestal ug ako ania sa ubos. Naningkamot ko pag-abot niya. Wa ko molampos. Sayop tingali ang tanan nakong gibuhat. Kalit lang siyang nawala. Gibiyaan ko niya, Mommy…”

“Wala ka diay masayod, Bell? Tua na siya sa Hawaii,” matod sa inahan ni Conrad kinsa wala mapugngi ang pagdaligdig sa luha, “naningkamot, nagpadayon pagtuon, nag- doctorate na siya didto. Sa iyang mga sulat, kapila baya to nangutana kon nakasuroy ka ba sa balay, unya karon ra man ta nagkita...”

(KATAPOSAN)