Manila Bulletin

( ANG INYONG KAPALARAN SA HUNYO 16-30, 2021)

Ni Madam Gertrudes-Lee

SAGITTARIUS – (Nobiyembre 22 – Disyembre 21) – Dako kag ikatabang nga maayom-ayom ang panagbingkil sulod sa pamilya. Kinahanglang nga maghari kanunay ang kalinaw ug kahapsay sa pamuyo. Maagni mo ang imong mga igsoon nga mosimba na matag Domingo. Kusog ang imong karisma. Sabado ang suwerte mong adlaw ug 9, 4, 3 ang palaran mong numero.

CAPRICORN – (Disyembre 22 – Enero 19) – Niining mga semanaha daghan kag matapos nga mga gimbuhaton. Mosamot kataas ang marka sa imong perpormans. Dako ang kahigayonan nga maapil ka sa promosyon. Himoon kang modelo sa imong mga manghod. Matagbawon ang salohang romansa. Suwerte mong adlaw ang Huybes ug palaran mong numero ang 5, 7, 9.

AQUARIUS – (Enero 20 – Pebrero 18) – Di ka angayng mabalaka sa umaabot. Mopabor kanimo ang maayong kahigayonan. Kinahanglan nga mosalig ka lang sa imong katakos ug abilidad. Daghan ka pang makombinser sa maayo mong suhestiyon. Kusog ang imong sex appeal. Domingo ang suwerte mong adlaw ug 2, 6, 8 ang palaran mong numero.

PISCES – (Pebrero 19 – Marso 20) – Niining mga semanaha may mobutho sa pagbisita kanimo. Magdala kinig maayong balita. Mahinayon ka nang mobiyahe sa abroad. Mausab na ang dagan sa imong panginabuhi. Makahibalag kag binuhat nga mounong kanimos hangtod. Suwerte mong adlaw ang Biyernes ug palaran mong numero ang 3, 5, 7.

ARIES – (Marso 21 – Abril 19) – Masulbad na ang suliran nga nakapahasol kanimo. Motanyag og tabang ang imong igsoon nga nagtrabaho sa abroad. Dunggon na ang imong mga pagampo. Di ka na mobalibad nga sangonan og katungdanan sa simbahan. Mainit ang romansa. Martes ang suwerte mong adlaw ug 4, 6, 8 ang palaran mong numero.

TAURUS – (Abril 20 – Mayo 20) – Niining mga semanaha di magpaluba ang imong kahiladman sa mga pagsungog sa kahigayonan. Andam ka nang moasdang sa mga pagsulay sa kinabuhi. Daghan ka nag leksiyon nga makat-onan. Pahinuntan mo ang hunghong sa kahidlaw. Suwerte mong adlaw ang Biyernes ug palaran mong numero ang 7, 2, 5.

GEMINI – (Mayo 21 – Hunyo 20) – Adunay mokonsulta kanimo bahin sa suliran sa gugma. Ang imong tambag makasamot sa kainit sa pagbati. Daghan kag matabangan. Makig-uli sa maayong kabubut-on ang nasilo mong higala. Masum-ok kag relasyon nga magmalungtaron. Miyerkoles ang suwerte mong adlaw ug 9, 6, 3 ang palaran mong numero.

CANCER – (Hunyo 21 – Hulyo 22) – Niining mga semanaha mobalik paglagsik ang imong panglawas. Dako ka nag ikatabang nga magmalamposon ang gipasiugdahan nga proyekto. Daghan ang mohugop sa maayo mong ideya. Bation mo ang talagsaong kainit sa lahing pagbati. Suwerte mong adlaw ang Domingo ug palaran mong numero ang 4, 6, 8.

LEO – (Hulyo 23 – Agosto 22) – Makabaton og kasanag ang imong paningkamot. Adunay motabang nga daling matapos ang imong proyekto. Daghan ang makagusto sa imong serbisyo. Di ka angayng malimot pagpasalamat sa Kahitas-an. Mopahiyom ang masadyaong kaagi. Sabado ang suwerte mong adlaw ug 5, 9, 4 ang palaran mong numero.

VIRGO – (Agosto 23 – Septiyembre 22) – Niining mga semanaha makapahinangop ang gipakitang kadasig sa imong kabanay. Dako ang purohan nga mahinayon ka pagtrabaho sa abroad. Masulbad na gayod ang giatubang mong problema. Malunhat ang dugay nang gitipigang pagbati. Suwerte mong adlaw ang Huybes ug palaran mong numero ang 3, 7, 2.

LIBRA – (Septiyembre 23 – Oktubre 22) – Di ka makabalibad sa itanyag kanimo. Pagmatngon kay basig masulod ka sa lit-ag sa lingla. Kinahanglan nga kanunay kang mosangpit sa Ginoo. Dako na ang kausaban sa batasan sa imong igsoon. Madani kas katam-is sa pahiyom. Martes ang suwerte mong adlaw ug 8, 7, 6 ang palaran mong numero.

SCORPIO – (Oktubre 23 – Nobiyembre 21) – Niining mga semanaha malaksi na sa imong handomanan ang malaksot nga kagahapon. Madasig ka na sa imong paglihok-lihok. Daghan ang makamatikod sa lahing awra sa imong personalidad. Mangamang ang kagilok sa kahidlaw sa mga parayeg. Suwerte mong adlaw ang Lunes ug palaran mong numero ang 2, 1, 5.

Balita

tl-ph

2021-06-16T07:00:00.0000000Z

2021-06-16T07:00:00.0000000Z

https://manilabulletin.pressreader.com/article/282119229501728

Manila Bulletin Publishing Corp