Manila Bulletin

Boarding House

(Gula 5)

Ni MAR MAÑUS, JR.

TICKET sa barko paingon sa Manila ang sulod sa sobre. Ug akong ngalan ang nahitala sa passenger. Unya may gipataban nga sulat. Ako dayong gibasa: “Dear Kaycee, uban niining sulat mao ang ticket sa barko alang nimo. Molarga na ko sa Manila ugma aron didto na mopadayon pag-eskuyla. Kon tinuod gyod kang na-in love nako, magkuyog ta paingon sa Manila. Magpaabot ko nimo ugma sa barko before sa oras sa departure nga nabutang sa ticket. Loving you, Reuben.”

Naghinuktok ko human nako nabasa ang sulat ni Reuben. Gitimbang-timbang nako kon unsay angay kong buhaton. Tumanon ko ba ang gustong mahitabo ni Reuben? O balibaran ko siya. Kon tumanan ko siya, nagpasabot kini nga hingpit na akong mirebelde sa akong parents. Kon dili ko usab siya tumanan, nagpasabot usab kini nga posibleng dili na kami magkita hangtod sa hangtod. Ug mahulog sa walay katumanan ang among gugma?

Nianang pagkagabii, nagsigeg chat si Reuben nako. Una, gipangutana ko niya kon nadawat ba nako ang gipadala niyang sobre. Sa dihang mi- reply ko nga ako nang na- receive, gipahunat ko niya kon mokuyog ba ko niya. Ako siyang gitubag nga wala pa ko makadesisyon. Gipasaligan ko siya nga mo-PM lang ko niya kon unsay akong desisyon.

Wala dayon ko makatulog niadtong gabhiona. Maoy akong gisigehag hunahuna ang gisugyot ni Reuben nga magkuyog mi sa Manila. Maayo kaha nga mouban ko niya? Unsa man kahay nagpaabot namo didto sa Manila kon mokuyog ko niya? Ug unsaon na man lang ang akong pagtuon? Gihunahuna ko kini pag-ayo. Sa dihang mibati na kog duka, nakahukom na ko kon unsay akong buhaton.

Pagkabuntag, nanghipos ko sa akong mga dad-onon. Namili lang kog pipila ka sapot ug uban pang gamitonon nga igo lang masulod sa usa ka bag nga dili kaayo dako. Dili ko magdala og daghang gamit aron dili ko maglisod paglighot inigkagabii. Mas maayo nga walay sagabal sa akong paglighot.

Sumala sa nahipatik sa tiket, 11:30 PM ang departure sa barko. Kinahanglang makabiya ko sa among balay sa alas 10 o sa wala pay alas 10. Mag- taxi ko paingon sa Pier 1 aron madali.

Igo lang kong nakahuman pagpanghipos sa akong mga dadonon, mi-PM na sad si Reuben nako. Nagpakisayod siya kon nakadesisyon na ba ko pagkuyog niya. Mi- reply ko nga mokuyog ko ug gani nakapanghipos na man ko sa akong mga dad-onon. Nalipay kaayo siya sa akong desisyon.

Dihay nanuktok sa pultahan sa akong kuwarto. Gi- off nako ang akong cellphone ug gidali nakog pasok sa ilawom sa kama ang bag nga gisudlan sa akong mga dad-onon. Nagpadayon ang pagpanuktok sa sera sa pultahan. Akong giablihan. Si Mama Marlinda diay.

“Mamahaw na ta,” nagkanayon si Mama.

“Mosunod lang ko, Ma,” tubag ko.

Mibiya si Mama. Gibalik nakog tak-op ang sera sa pultahan. Akong gikuha ang cellphone nga akong gipasok sa ilawom sa akong kama. Mi-PM ko kang Reuben. Ako siyang giingnan nga dili na lang mokontak sa akong selpon aron dili masakpan sa akong parents ang among plano ug magpaabot na lang siya nako sa barko. Human nako madawat ang reply ni Reuben nga

mi-OK siya sa akong gisugyot, migawas ko sa akong kuwarto ug miadto sa komedor aron mamahaw.

Nianang tibuok adlaw, nagbinuotan ko sulod sa among panimalay. Mitabang ko kang Mama sa mga buluhaton. Pagkahuman, nagpuli-puli mi si Papa Amado sa pagkanta sa videoke. Mao kini ang nahunahunaan kong pamilin-bilin kanila kay sa dili madugay mahilayo na man ko kanila. Bug-os na ang akong hukom. Mokuyog ko kang Reuben!

Miabot ang kagabhion. Lapas na sa alas 9. Nabalaka ko kay si Papa didto pa sa sala nagtan-aw og TV. Unsaon man nako paggawas sa balay? Wala ko mahimutang sulod sa akong kuwarto kay quarter to 10 na sa akong relo apan si Papa Amado nagtan-aw pa gihapon og TV sa sala. Dili ko makagawas sa balay kon dili mobiya si Papa sa sala. Naghigwaos na ko pag-ayo.

Mi- chat na sad si Reuben nako bisan gibaoran ko siyang dili na mokontak sa akong selpon. Wala gyod tingali siya makaantos. Gibasa ko ang iyang message. Nag- ask siya kon nakabiya na ba ko sa balay. Mi- reply ko. Gitug-anan ko siya nga wala pa ko makagawas kay si Papa nagsige pag tan-aw og salida sa TV sa sala.

Mi- reply na pod siya. Nakasabot ko nga mibati na siyag tumang kabalaka. Giingnan ko siya nga kinahanglang mangita ko og paagi nga makalighot sa among balay kay tingalig mabiyaan ko sa barko.

Nanglabay ang mga gutlo. Namatikdan ko nga nahilom na ang sala ug gipalong na ang suga. Nakaginhawa kog luag. Unya nabati ko nga mitakandal ang palid sa pultahan nilang Mama ug Papa. Misulod na si Papa. Nalipay ko kay makahigayon na ko paggawas sa balay.

Sa dihang akong nasuta nga nagmingaw na ang palibot, gihinay nakog bulanit ang bag nga akong dad-onon gikan sa ilawom sa akong kama. Gisaling-ay ko kini sa akong abaga ug nagkinto ko nga mipaingon sa pultahan sa akong lawak.

Gihinay nakog abli ang sera sa pultahan sa akong kuwarto. Nag-amping gyod ko nga dili moigot ang sera aron dili gyod ko makamugna og kasikas aron walay makamatikod sa akong paggawas. Gikulbaan ko. Pero bahala na. Kinahanglang mobiya ko sa akong parents ug mouban sa lalaki nga akong gihigugma.

Sa dihang naabli na ang sera sa pultahan sa akong kuwarto, milili ko sa gawas. Mingaw na ang palibot. Nangatulog na tingali sila si Papa ug Mama. Mainampingon kong migawas sa akong kuwarto. Nagkinto ko nga milakaw tadlas sa sala paingon sa main door. Unya sa dihang ako na untang lisoon ang doorknob sa sera sa main door, kalit lang misiga ang suga sa sala. Naigking ko. Gikulbaan ko pagkakita nako nga si Papa Amado diay ang nagpasiga sa suga. Nagmata pa diay siya.

“Asa ka paingon?” Nagmugtok ang nawong ni Papa. “Nganong nagdala man ka og bag?”

“P-Papa…” Mao ray akong nalitok kay mikurog ang akong baba.

“Gusto tingali kang molayas, no?”

Wala ko motingog.

“Wa gyod diay ko masayop sa akong pagtuo nga may buhaton kang milagro karong gabhiona,” nagkanayon si Papa. “Nagduda na kong daan tungod niadtong talagsaon mong pagbinuotan ganihang adlawan.”

Wala gihapon ko motingog. Gibantayan diay ni Papa ang akong mga lihok. Bisan sa eskuylahan iya kong gisunod-sunoran mao nga nasayod siya sa tanan kong kalihokan.

(SUMPAYAN PA)

Buot si Kaycee nga mokuyog kang Reuben sa Manila apan nasakpan sa iyang amahan ang iyang laraw...

Salad Bowl

tl-ph

2021-09-16T07:00:00.0000000Z

2021-09-16T07:00:00.0000000Z

https://manilabulletin.pressreader.com/article/281741272563043

Manila Bulletin Publishing Corp