Bagani Tagna Ang sa mga

Sulat-Ensiklikal Ni Santo Papa Francisco Kabahin Sa Pagpakabana Sa Atong Usa Ka Puy-anan

16. Ang Mga Mangangaso

NGANONG wala pa man siya mapukaw? Ingon nimo usa ra ka baso ang gikinahanglan?” pangutana ni Robert Makaindan samtang namahaw sila.

“Abang, nganong maorag nagdali ka nga magkaestorya mo?” tiaw-tiaw ni Laga Pigsayu. “Bitaw, Abang, unya pa na siya mapukaw. Kay kadtong giingon ko nga usa ra ka baso, kadto mahitabo kon usa ra sab ka dahon ang gilaga. Apan tungod kay pito ka dahon ang gilaga, mao nga dili dali masuyop sa iyang lawas ang tambal. Apan ayawg kabalaka kay tungod sab niini, dili lang kabaskog ang iyang maangkon kondili maalim sab ang mga balatian sulod sa iyang lawas.”

“Mao diay. Maayo kon mao,” miyango si Robert Makaindan. “Laga, ayawg kalimot sa atong prente, ha. Mga mangangaso ta nga sulugoon sa usa ka banggiitang prinsesa.”

“Tuod diay, Abang, maninuod gyod ta nga mangaso?” pangutana ni Laga Pigsayu.

“Aw, unsaon man natog prente nga mangangaso ta kon wa tay ikapakita?” matod ni Robert Makaindan.

“Abang, dili ba usa sa imong tumong nga matabangan nato siya nga makaposisyon isip agalon sa banay Binuklasan?” pangutana ni Laga Pigsayu.

“Oo. Ngano man, unsay imong nahunahuna?” sukli nga pangutana sa lalaki.

“Abang, tanyagan nato si Dayangdayang Manganingga nga mopailawom sa ato kunohay nga prinsesa. Sa ingon niini nga paagi, mahadlok ang uban sa pagbatok kaniya bisan kon wala na unya ka dinhi,” tubag ni Laga Pigsayu.

“Nganong mahadlok man sila?” naglibog ang ulitawo. Tataw nga wala siyay kasayoran sa dagan sa politika sa kalibotan sa Libungan.

“Ug nganong dili sila mahadlok? Kinsay dili mahadlok sa prinsesa nga bagani gikan sa usa ka sapian ug dakong banay sa kontinente?” matod ni Laga Pigsayu.

Nahibulong si Laga Pigsayu nga maorag walay hibangkaagan mahitungod sa dagan sa gahom-politikal ang tawo nga nagpaila kaniya isip si Layok Mambunsudan. Sumala sa iyang nabantayan, dili taga Kidampiyas ang maong tawo. Sa iyang tan-aw, malagmit usa kini ka bagani nga gikan sa usa ka dakong banay sa kontinente nga nanimpalad aron mabansay sa tinuoray nga pakiggubat.

Apan nganong wala man kiniy dala nga hinagiban? Mao nga natahap sab siya nga basin usa kini ka baylan sumala sa kalawom sa kahibalo niini sa daghang butang nga adunay kalambigitan sa mga ritwal ug mga butang nga tinago. Mao kadto nga dakong pangutana alang sa babaye ang pagka walay hibangkaagan sa lalaki mahitungod sa dagan sa politika. ‘Gikan kaha siya sa usa ka misteryosong banay sa kontinente nga dili manginlabot sa dagan sa gahom-politikal?’

Daghang pamasin ang mingsulod sa hunahuna ni Laga

Pigsayu. Ilabi na kay nabatian niya nga adunay daghang sekreto ang tawo nga nagpaila isip si Layok Mambunsudan. Ug labaw pa nga mingdaghan ang iyang katahap tungod kay nasayod man siya nga dili kadto ang tinuod nga nawong sa maong tawo. Dili kini malilong sa sama ni Laga Pigsayu nga hanas sa daghang takuban isip usa ka iyakan.

“Tuod lagi, no?” matod pa ni Robert Makaindan nga maorag mihayag ang hunahuna. Didto lamang niya nahunahuna nga

malagmit dali rang masulbad ang mga suliran ni Dayangdayang Manganingga sa ingon niadto nga pamaagi. “Sige, mao nay atong buhaton. Ikaw nay mahibalo nga moagni ana niya.”

“Lain pay ako, Abang, unsa man gyod ang imong linya, bagani o baylan?” pangutana ni Laga Pigsayu nga wala na makapugong sa iyang kaugalingon. Sa pipila ka adlaw nga sila nagkuyog, wala nay kataha ang maanyag nga iyakan sa pagpakigsulti kang Robert Makaindan.

Nakalitan si Robert Makaindan sa maong pangutana. Dili tungod kay si Laga Pigsayu ang nangutana, apan tungod kay kadto nga pangutana anaa na sa luyo sa iyang hunahuna sukad nga nahiamgo siya sulod sa kalibotan sa Libungan. Adunay sahi nga gibug-aton kaniya ang pagka baylan tungod kay ang banay Makaindan usa man ka banay sa mga baylan nga ang kagikan masubay pa hangtod sa banggiitang baylan nga nailhan isip si

Buuy Baylan ta Nalandangan. Apan sa iyang mubo nga kasinatian, nasabtan niya nga sa bisan asang kalibotan ang tahoron lamang mao ang kusgan ug gamhanan.

“Unsa may imong tan-aw?” matod ni Robert Makaindan nga milikay og tubag. Sa iyang hunahuna, kinahanglan pa niyag ubayubay nga panahon aron tin-awon kon unsa gyod ang dalan nga iyang pagalakwan. Ilabi na kay sa dihang nahimamat niya ang tipik sa galamhan ni Abang Baylan Manlayanglayang, nabalhin ang iyang bantang mahitungod sa pagka baylan. Tungod kay didto lamang niya nasuta nga kon buot hunahunaon, labing gamhanan pa ang maong baylan bisan kon itandi sa kinakusgang mga bagani sa Libungan.

“Na, ambot nimo, uy. Mao ganing nangutana ta nimo,” matod ni Laga Pigsayu. Natingala siya tungod kay dili sama sa mga busaw nga walay pagtagad sa kalainan sa baylan ug bagani, ang tawo nga sama ni Robert Makaindan dugay na man unta nga nakahukom kon unsay iyang dalan. Mao nga nadugangan na sab ang mga pangutana sa hunahuna sa maanyag nga iyakan. ‘Klaro man nga tawo siya. Apan ngano man nga maorag lahi man kaayo siya kon itandi sa uban? Diing suok sa Libungan siya gikan?’

Igo rang mipahiyom si Robert Makaindan. Nakamatikod na siyang daan sa dugang nga interes kaniya ni Laga Pigsayu. Apan tungod sa namat-an niya nga mga pagtuo mahitungod sa mga busaw, wala niya kadto hatagig bili. Sa kalibotan man god nga

Gisugdan nila ni Robert Makaindan, Laga Pigsayu, ug Dayangdayang Manganingga ang pagpangaso sa lasang...

iyang gigikanan, midako siya sa pagtuo nga tulo ray pilian nga tumong sa busaw. Una, kan-on ang lawas sa tawo. Ikaduha, kanon ang mga kalag ug gimokod sa tawo. Ug ang ikatulo, kan-on ang lawas, mga kalag ug gimokod sa tawo.

Nahilom ang duha human kadto. Maorag nag-iyahayg hunahuna sa ilang kaugalingong dalan nga buot pagalakwan. Kon sa kalibotan nga gigikanan ni Robert Makaindan, dili katuohan nga makita ang usa ka busaw ug usa ka tawo nga malinawong nanglingkod samtang hinay-hinay nga milabay ang kabuntagon.

Sa laing bahin, maorag gidaman si Dayangdayang

Manganingga sa dihang napukaw siya. Naglibog siya kay sa iyang pagbangon, nabati niya nga siya anaa sa usa ka lantay nga binuklaran og banig nga ginama sa tanom nga sudsod. Nakita niya ang baga nga habol ug ang mga alugnan.

“Hain man ko?” pangutana niya sa iyang kaugalingon dayong liraw sa iyang panan-aw. Didto lamang niya nahinumdoman ang nahitabo sa miaging adlaw.

“Hala, unsa may nahitabo nako?” nakuratan si Dayangdayang Manganingga sa dihang nabatian niya nga maorag nag-awas-awas ang kusog sa iyang lawas. Hagkap ang iyang pamati. Maorag damgo na lamang ang tanang kakapoy nga iyang gibati sa miaging mga adlaw. Gibendahan na ang iyang mga samad ug giilisan og hinlo nga biste ang iyang nagkagidlay nga gisuot.

“Giluwas ko nila?” matod ni Dayangdayang Manganingga. Nahinumdoman niya ang babayeg lalaki nga iyang naabtan sa wala pa siya malipong.

Mibangon siya. Milili dayon siya sa gawas sa tolda. Maoy iyang nakita ang duha nga hilom nga nanglingkod samtang maorag nagbantay sa paglabay sa adlaw. Miduol dayon siya sa duha.

“Daghang salamat sa inyong pagtabang nako!” matod ni Dayangdayang Manganingga dungan ang pagduko. “Unta moabot ang adlaw nga makabalos ako sa inyong kaayo kanako.”

“Maayo kay napukaw na ka.” Si Laga Pigsayu ang mitubag. “Ayawg kaikog namo, uy. Angay lang gyod nga motabang ta kon adunay nanginahanglan sa atong tabang.”

“Mmmm. Ayawg kataha,” matod ni Robert Makaindan.

“Mao na gyoy imong palad nga dinhi ipadpad namo. Kaon sa og pamahaw.”

Tuod man, wala na mataha ang dalaga sa pag-ambit sa pamahaw. Nakabantay siya nga hamtong na ang lalaki samtang batan-on pa kaayo ang panagway sa maanyag nga babaye. Sa iyang tan-aw, malagmit dili yanong mga tawo ang duha. Kadto tungod kay kompleto sila og gamit ug tataw nga wala sila mahadlok bisan kon ang ilang gikampohan duol ra sa baga nga lasang nga seguradong adunay bangis nga mga mananap. Dugang pa niini, lahi ang tonada sa ilang sinultihan.

“Gikan sila sa dagkong banay sa kontinente?” mao kadtoy misulod sa hunahuna ni Dayangdayang Manganingga. Nakadungog na siya sa mga estorya bahin sa mga kaliwat sa dagkong mga banay nga manglaag sa layo nga mga banuwa aron makabaton og kasinatian.

“Tuod diay, unsay imong ngalan, Laga?” pangutana ni Robert Makaindan.

“Dayangdayang Manganingga,” tubag sa dalaga. “Ako ang manununod sa banay Binuklasan dinhi sa Isla Kidampiyas. Tawga lang ko ninyog Yangyang. Kamo, unsay akong itawag kaninyo?”

“Tawga lang kog Saliyaw,” matod pa ni Laga Pigsayu.

“Ako, tawga lang kog Abang,” matod sab ni Robert Makaindan. “Tuod diay, asa man ka padulong?”

“Mouliay ko sa Liwaraan,” tubag sa dalaga. “Kamo, Abang?” “Kami? Aw, mianhi mi aron mangaso diha sa baga nga lasang. Mangangaso tuod diay mi. Gisugo mi sa among agalon nga mangaso dinhing dapita. Lain pay ako, kon wala ka magdali, puyde ka mouban sa among pagpangaso. Kay pagkahuman namog pangaso, ibaligya namo sa Liwaraan ang tanan nga among madakpan nga mananap nga dili gusto sa among agalon,” matod ni Robert Makaindan.

“Aw, kon dili ko makadugang og kabug-at kaninyo, andam ko nga motabang sa inyong pagpangaso,” matod ni Dayangdayang Manganingga. Nakuratan ang dalaga sa dihang nadungog nga mangangaso ang duha. Sa ilang panagway, tataw nga dili sila mangangaso. Mikusog ang iyang katahap nga malagmit gyod gikan sa dagkong banay sa kontinente ang duha.

“Maayo kon mao,” matod ni Laga Pigsayu. “Kay sumo na kaayo nga si Abang ray maminaw sa akong mga tagawtaw.”

Nangatawa silang tanan. Sa dihang nakita niya nga miangay ang dalaga sa ilang sugyot, nalipay si Robert Makaindan. Nagpakaaron-ingnon dayon siya nga magkabo og tubig aron mahatagan og panahon nga magkahinabi ang duha ka babaye.

“Saliyaw, salamat gyod kaayo ninyo ni Abang,” kinasingkasing nga pulong ni Dayangdayang Manganingga. “Kon wala mo, malagmit gikitkitan na ko karon sa bangis nga mga mananap.”

“Ayaw na tog hunahunaa, uy,” matod ni Laga Pigsayu. “Ang mahinungdanon nga luwas ka. Tuod diay, Yangyang, nganong naginusara man ka?”

“Taas nga estorya kon ngano,” tubag sa dalaga. “Apan pamati kay akong isaysay.”

Tingali tungod kay parehas sila nga babaye mao nga dali rang misalig ang dalaga kang Laga Pigsayu. Ug tingali sab kadto tungod kay nakakitag higayon ang dalaga nga ipahungaw ang mga butang nga nanghuot sa iyang dughan. Didto lamang masayri ni Laga Pigsayu kon unsay nahitabo sa tawo nga ginganlag Layok Mambunsudan. Ang iyang dakong gikatingala tungod kay ang paglarawan ni Dayangdayang Manganingga sa maong tawo, dili man mohaom sa Layok Mambunsudan nga iyang nailhan.

“Mao diayng misulod siya sa Lasang sa Mantukobay,” matod ni Laga Pigsayu sa dihang nadungog ang saysay sa dalaga kon giunsa kinig gukod sa tulo ka bagani.

Padayon nga gisaysay sa dalaga ang mga nanghitabo kaniya apan wala niya hisgoti ang mahitungod sa usa ka dangaw kuwadrado nga panit nga puyde niyang sakyan. Pinaagi sa mga saysay ni Dayangdayang Manganingga, nahunahuna na ni Laga Pigsayu kon unsaon nila pagtabang sa dalaga aron dali kini nga makaplastar isip pamuno sa banay Binuklasan.

“Yangyang, kinahanglan nimo og salapi kon mao na,” matod ni Laga Pigsayu. “Ayawg kabalaka, hangyoon nato si Abang nga hatagan kag dakong bahin sa halin sa atong madakpan nga mga mananap.”

“Hala, ayaw na lang, Saliyaw,” pulong ni Dayangdayang Manganingga. “Maulaw baya ko ninyo ana ni Abang.”

“Ayaw lagig kaikog namo, uy,” matod ni Laga Pigsayu.

“Ang tinuod, panglingaw-lingaw ra man sab namo ang halin sa pagbaligyag mga mananap.”

“Aw, basin unyag unsay masulti sa inyong agalon,” matod sa dalaga.

“Aw, unsa pay sultihon nga usa ra may gusto sa among agalon,” tubag ni Laga Pigsayu. “Kinahanglan ra namo nga makadakop og usa ka pula nga kalasungay.”

“Kon mao, daghang salamat gyod,” matod ni Dayangdayang Manganingga. Nalipay kaayo siya nga adunay mga tawo nga

makatabang kaniya. Nadugangan ang iyang paglaom nga maluwas ang iyang manghod nga babaye.

“Basta ayawg kaikog namo ni Abang,” tubag ni Laga Pigsayu. “Pagsaba lang kon aduna kay kinahanglan kay motabang mi nimo kutob sa among mahimo.”

Human kadto, padayon sa pagtabi ang duha ka babaye. Walay kasayoran si Dayangdayang Manganingga nga ang babayeng iyang kahinabi nga daw buotan kaayo, usa diay ka mangtas nga iyakan. Ug nga ang maong babaye mao kadtong binuhat nga laksot kaayo ug mibanhig kaniya sa Lasang sa Mantukobay. Nga ang maong babaye milaraw nga angkonon ang lawas sa dalaga.

Samtang sila nag-estoryahanay, wala kalikayi ni Dayangdayang Manganingga nga matingala kon nganong buotan kaayo kaniya ang duha ka tawo nga wala niya sukad mahimamat. Natahap siya nga aduna kiniy dakong hinungdan. Apan unsa kaha? Wala siyay nabatian nga daotang tinguha gikan sa duha mao nga natahap siya nga malagmit adunay tawo nga misugo kanila aron tabangan siya. Apan kinsa kaha? Siya kaha ang giingon nila nga ilang agalon? Apan labaw pa nga naglibog ang dalaga tungod kay wala siyay natiman-an nga higala niya o kaha sa ilang banay nga gikan sa dagkong banay sa kontinente.

“Dali na mo kay maniudto na ta,” matod pa ni Robert Makaindan. Ganina pa siya nakabalik gikan sa pagkalos og tubig ug nakahikay na og paniudto. Gipasagdan lang niya nga maglami ang pagtabi sa duha ka babaye. Alang kaniya, maayo nga mahimong suod nga managhigala sila si Dayangdayang Manganingga ug Laga Pigsayu.

Sa tanto nilang pagtabi, wala na mabantayi sa duha ka babaye ang pag-abot sa udtong tutok. Nangatawa na lang sila sa dihang nadungog ang pagpangagda ni Robert Makaindan. Nalipay ang duha sa dihang nakita nga ang ilang sud-an inasal nga manok ihalas. Nangalimyon ang kahumot sa inasal sa dihang gigutadgutad kini sa lalaki.

“Diin ka nakadakop ani, Abang?” pangutana ni Laga Pigsayu. “Didto duol sa lasang. Nagsulay kog panglit-ag didto. Pito ka lit-ag ang akong gihimo. Unya pagbalik nako sa agi, nakuratan ko kay nakalit-ag na man ang tulo nga akong gihimo,” matod ni Robert Makaindan. “Malagmit daghan gyod tag madakpan didto nga puyde nato ibaligya.”

“Mmmm. Lahi gyod ang lami sa manok nga ihalas,” matod ni Laga Pigsayu. “Mao gyod,” matod sab ni Dayangdayang Manganingga. “Na, hala, banat na mo. Pangaon mog daghan kay human natog paniudto, mosulod na ta sa lasang. Didto na ta mangatulog kay aron ugma sayo sa buntag dali ra nato mabantayan ang pagpanggawas sa mga mananap,” matod ni Robert Makaindan.

Milanog ang huni sa kalaw sa kahaponon sa dihang nakasulod na ang tulo ka mangangaso sa lasang. Ang tulo walay lain kondili sila si Robert Makaindan, Laga Pigsayu ug Dayangdayang Manganingga. Mao pay ilang pagsulod sa lasang sa dihang nadungog nila ang linagubo sa duha ka mananap nga nagsangka niadtong tungora. Misenyas dayon ang lalaki nga manaka sila sa usa ka dakong punoan sa kahoy nga andalugong.

“Unsa man nang mga mananapa?” hunghong ni Dayangdayang Manganingga. Mao kadto ang unang higayon nga nakakita siya og ingon niadto nga mananap. Maora kadto og mga kanding nga walay sungay apan ingon kadagko sa kabaw. Apan ang nakasahi kay adunay batong kristal nga nagbugdo sa agtang sa maong mga mananap. Kolor bronse ang ilang panit. Ug aduna silay hait kaayo nga mga bangkil.

“Kon wala ko masayop, mao na ang gitawag nga kilab-banglus,” matod pa ni Laga Pigsayu. “Abang, kinahanglan madakop nato na.”

“Kilab-banglus!” dako ang pagkasorpresa ni Dayangdayang Manganingga. Nasayod siya nga talagsaon ang maong mananap. Mao nga dako ang iyang katingala nga nakakita siyag duha.

“Oo, kilab-banglus,” matod ni Laga Pigsayu. “Ang mananap nga…”

Wala na mahuman si Laga Pigsayu sa paglarawan sa maong mananap tungod sa sunod-sunod nga mga kilat. Kadtong maong mga kilat maorag nanglugsot gikan sa batong kristal nga nagbugdo sa agtang sa maong mga mananap. Nagpiti-piti ang agi sa mga liti hinungdan nga nangabali ang mga sanga sa mga kahoy duol sa lugar diin nagsangka ang duha ka kilab-banglus.

Samtang sa laing bahin, walay giusikan nga panahon si Robert Makaindan. Sa iyang hunahuna, gilitok dayon niya ang mga pulong aron moumol og patik sa pagka ulipon. Sa usa ka pagpamilok, misulod dayon sa galamhan sa duha ka mananap nga nagsangka ang patik sa pagka ulipon. Ug sa dihang midulot na ang gahom niadto sa ilang galamhan, kalit ra sila nga nanghunong sa pagsangka. Dungan sila nga miyanghag padulong sa nahimutangan sa mga mangangaso.

“Hala, ila tang nakita!” matod ni Dayangdayang Manganingga sa iyang kakurat.

Taliwala sa iyang kahingawa, natingala si Dayangdayang Manganingga kay maorag wala may kurat ang duha niya ka kauban. Nakita niya nga mikanaog ang lalaki gikan sa kahoy diin sila mingsaka. Ug dungan sa iyang pagkanaog, miduol ang mga kilab-banglus. Naniga ang mga mata sa dalaga sa dihang nakita nga sayon ra kaayo nga gipanghiktan sa lalaki ang duha ka kilabbanglus.

“Dali na mo kay mopadayon na ta,” matod ni Robert Makaindan.

“Nganong kalit ra man nga nahimong tagam ang bangis nga mga mananap?” pangutana ni Dayangdayang Manganingga sa iyang kaugalingon. Miatubang siya kang Laga Pigsayu aron makakuhag impormasyon apan misenyas lamang kini kaniya nga magdali sa pagkanaog.

Nakasakay na si Robert Makaindan sa likod sa usa ka kilabbanglus sa dihang nakanaog na ang duha ka babaye. Gisenyasan dayon niya ang duha nga manakay sa nabilin nga kilab-banglus. Human kadto, mingpadayon silag sulod sa baga nga lasang. Wala madugay, nakaabot sila sa usa ka langob. Sa dihang natino ni Robert Makaindan nga luwas ang maong lugar, nakahukom siya nga didto sila mopahulay.

“Mosayo tag bangon ugma,” matod ni Robert Makaindan samtang nangaon sila og panihapon. “Daghan ang mananap dinhing dapita. Kon suwertehon lang ta, malagmit makadakop tag kalasungay. Nabasa nako kaniadto nga usa sa timailhan nga adunay kalasungay kon adunay kilab-banglus. Kinaham nga pagkaon sa kalasungay ang karne sa kilab-banglus.”

“Kalasungay? Kadtong gikaingon nga salakyan sa panggubatan?” matod ni Dayangdayang Manganingga sa iyang kaugalingon. “Dili gyod basta-basta ning mga tawo nga akong nahimamat.”

(PADAYONON)

(Sa atong mainitong pagdawat ning labing ulahing ensiklikal ni Papa Francisco, nahunahunaan nako nga mapaambit kini sa hinay-hinay diha sa ato mismong pinulongan. Dili ko makaingon nga mao gayod kini ang tukmang hubad sa Binisaya apan sa akong makaya akong gipaningkamotan nga makuha ang unod niini. Ang nakanindot sa estilo ni Papa Francisco mao nga migamit siyag lengguwahe nga masabtan sa mga tawo. Hinaot unta nga pinaagi niini makalambigit kita sa ubang hugpong nga nagpadayon sa paglihok alang sa pagpakabana sa atong usa lamang ka puy-anan. – Taghubad) (Ika-28 nga Gula)

IX. LAGPAS PA SA ADLAW

243. Sa kataposan, mahimutang kita atubangan sa walay kinutobang kaambong sa Diyos (tan-awa 1 Cor 13:12), ug makabasa uban ang pagdayeg ug kalipay sa misteryo sa kalikopan, nga uban kanato makaambit sa walay-kataposang kapuno. Bisan karon nagapanaw kita ngadto sa sabat sa eternidad, ang bag-ong Herusalem, ngadto sa pinuy-ana natong tanan sa langit. Si Hesus miingon: “Akong bag-ohon ang tanang butang” (Gipadayag

21:5). Ang walay-kataposang kinabuhi mahimong pagaambitan nga kasinatian sa kahingangha, diin ang matag nilalang, nausab ang panagway diha sa kasanag, maanaa sa angay niyang dapit ug adunay mahatag ngadto sa kabos nga katawhan nga makaangkon og kagawasan sa kataposan.

244. Sa kasamtangan, nagatigom kita sa pag-atiman niining maong pinuy-anan nga gihatag na kanato, uban ang kahibalo nga ang tanang maayo nga ania dinhi mapasaka ngadto sa langitnong kombera. Sa pagpakighiusa sa tanang linalang, nagapanaw kita latas niining yutaa nga nagapangita sa Diyos, kay “kon ang kalibotan may sinugdanan ug kon kini gihimo, kinahanglang mangutana kita kinsa ang naghatag niini og sinugdanan, ug kinsa ang Magbubuhat niini”. Manganta kita samtang kita nagapanaw. Unta ang atong mga pagpakigbisog ug ang atong pagtagad niining planeta dili magwagtang sa kalipay sa atong paglaom.

245. Ang Diyos nga nagtawag kanato sa manggihatagong kaakohan ug sa paghatag kaniya sa tanan kanato, naghatag kanato sa kahayag, kinsa nga nahigugma kanato pag-ayo, anaa kanunay. Wala kita niya pasagdi, wala niya kita biyaing nag-usara, kay gihiusa man niya ang iyang kaugalingon sa atong kalibotan, ug kanunay nga nagduso ang iyang gugma kanato sa pagpangita og bag-ong mga paagi sa pagpadayon. Pagdayeg alang kaniya!

***

246. Sa kataposan niining taas nga pamalandong nga pareho

Hinubad ni JON SAGUBAN

nga malipayon ug makatugaw, akong itanyag nga maghalad kitag duha ka pag-ampo. Ang una mahimo natong ipaambit sa tanan nga nagatuo sa usa ka Diyos nga gamhanan-sa-tanan nga Magbubuhat, samtang sa usa kitang mga Kristiyanos nangayo og kadasig sa pagkab-ot sa kaakohan sa kabuhatan nga anaa sa atong atubangan pinaagi sa Ebanghelyo ni Hesus.

Pag-ampo alang sa atong kalibotan

Diyos nga Makagagahom sa tanan, anaa ikaw diha sa tibuok kalikopan ug diha sa labing gamay sa imong mga linalang.

Imong gigakos sa imong kalumo ang tanan nga anaa.

Ibubo kanamo ang gahom sa imong gugma, aron among panalipdan ang kinabuhi ug ang kaambong. Pun-a kami sa kalinaw, aron magpuyo kami nga mga managsoon nga dili magapasakit kang bisan kinsa. O Diyos sa mga kabos, tabangi kami sa pagluwas sa mga sinalikway ug gikalimtan niining kalibotana, nga bililhon sa imong mga mata.

Ayoha ang among mga kinabuhi, aron among panalipdan ang kalibotan ug dili namo kini pahimuslan, aron magtanom kamig kaambong, dili polusyon ug kadaot.

Hikapa ang mga kasingkasing niadtong nagtan-aw lamang og ganansiya nga wala maghunahuna sa mga kabos ug sa yuta.

Tudloi kami sa pagkakita sa bili sa matag butang,

sa pagkapuno sa kahibulong ug pagpamalandong, sa pag-ila nga lawom ang among kahiusahan sa matag linalang samtang nagapanaw kami ngadto sa way kinutobang kahayag. Nagapasalamat kami kanimo tungod sa imong pag-uban kanamo matag adlaw.

Dasiga kami, nangamuyo kami kanimo, diha sa among pagpakigbisog

alang sa kaangayan, gugma ug kalinaw.

Usa ka Kristohanong pag-ampo sa pakighiusa sa kabuhatan

Amahan, nagadayeg kami kanimo uban sa imong mga binuhat. Nagagikan sila sa imong gamhanan sa ngatanan nga kamot; imoha sila, napuno sa imong presensiya ug sa imong maaghop nga gugma.

Pagadayegon ka!

Anak sa Diyos, Hesus, pinaagi kanimo nangahimo ang tanang butang. Naumol ikaw sa sabakan ni Maria among Inahan, nahimo ikaw nga bahin niining yuta, ug imong gitutokan kining kalibotan uban sa tawhanon nimong mga mata.

Karon buhi ikaw diha sa matag binuhat diha sa nabanhaw mong kahimayaan.

Pagadayegon ka!

Balaang Espiritu, pinaagi sa imong kahayag imong gigiyahan kining kalibotan ngadto sa gugma sa Amahan ug giubanan mo ang kabuhatan samtang nag-agulo kini sa kasakit.

Nagapuyo usab ikaw sa among mga kasingkasing ug gidasig mo kami sa pagbuhat og maayo.

Pagadayegon ka!

Tulo ka persona nga Diyos, katingalahang komunidad sa walay kinutobang gugma, tudloi kami sa pagpamalandong kanimo diha sa kaanyag sa kalikopan, kay nagasulti man kabahin nimo ang tanang butang. Pukawa ang among pagdayeg ug pagka mapasalamaton tungod sa matag linalang nga imong gibuhat.

Hatagi kami sa grasya sa lawom nga pagbatyag sa pagkadugtong

sa matag butang nga anaa.

Diyos sa gugma, ipakita kanamo ang among luna ning kalibotan isip mga agianan sa imong gugma alang sa tanang linalang niining yuta, kay walay usa kanila nga naliatan sa imong panan-aw. Hayagi kadtong nagaangkon og gahom ug salapi aron ilang malikayan ang sala sa way pagpakabana, aron ilang higugmaon ang kaayohan sa tanan, unahaon sa pagtagad ang mga mahuyang, ug atimanon kining kalibotan diin kami nabuhi.

Ang mga kabos sa yuta nanagsinggit.

O Ginoo, kuhaa kami sa imong gahom ug kahayag, Tabangi kami sa pagpanalipod sa tanang kinabuhi, sa pag-andam alang sa mas maayong ugma, alang sa pag-abot sa imong Gingharian sa kaangayan, kalinaw, gugma ug kaambong. Pagadaygon ka!

Amen. (KATAPOSAN)