( ANG INYONG KAPALARAN SA BUWAN SA OKTUBRE 2021)

SAGITTARIUS – (Nobiyembre 22 – Disyembre 21) – Niining buwana matapos na ang imong proyekto. Dako kag matabang sa mga tawo nga way trabaho. Ipadayon ang maayong binuhatan kay hatagan kag grasya sa Ginoo. Moapil kag kalihokan sa simbahan. Makapiyong ka sa kalalim. Suwerte mong adlaw ang Huybes ug palaran mong numero ang 4, 2, 8.

CAPRICORN – (Disyembre 22 – Enero 19) – Makahimo kang dunganon ang imong pagtrabaho ug pagtuon. Kinahanglan nga kini ang imong buhaton aron makatapos ka sa imong kurso. Hunahunaon mog maayo kay duna ka pay mga igsoon nga mag-eskuyla. Mainit ang romansa. Biyernes ang suwerte niyang adlaw ug 3, 8, 6 ang palaran mong numero.

AQUARIUS – (Enero 20 – Pebrero 18) – Niining mga semanaha moluwat kag mahinungdanong desisyon. Kinahanglan nga masulbad na ang giatubang mong problemang pinansiyal. Angay nga makamao ka nang magbadyet sa imong kinitaan. Di ka makabalibad sa agni sa kidhat. Suwerte mong adlaw ang Martes ug palaran mong numero ang 9, 2, 5.

PISCES – (Pebrero 19 – Marso 20) – Walay makapakgang sa imong maayong tinguha. Tun-an mog maayo ang angay mong buhaton. Magpabilin kang kalmado bisag nag-atubang kag krisis. Di ka magdali-dali sa pagpakanaog og desisyon. Matagbawon ang mga parayeg. Miyerkoles ang suwerte mong adlaw ug 7, 3, 4 ang palaran mong numero.

ARIES – (Marso 21 – Abril 19) – Niining bulana mopakita ka sa tinagoan mong abilidad. Daghan ang moabiba sa maangkon mong kalamposan. Dugangan pa ang imong pagpanglimbasog aron makab-ot ang imong gipangandoy sa kinabuhi. Kusog ang imong sex appeal. Suwerte mong adlaw ang Biyernes ug palaran mong numero ang 9, 2, 5.

TAURUS – (Abril 20 – Mayo 20) – Mahimong tabunokon ang malalangon mong imahinasyon. Matapos na ang obra nga makapahinuklog sa mga magbabasa. Lisod sundon ang imong estilo sa pagsulat. Magpabilin kang mapaubsanon bisan sa imong pagka inila. Dugosnon ang romansa. Lunes ang suwerte mong adlaw ug 5, 4, 3 ang palaran mong numero.

GEMINI – (Mayo 21 – Hunyo 20) – Niining bulana makadesider ka nang magtrabaho sa abroad. Kinahanglan nga makatapos ang imong mga anak sa ilang pag-eskuyla. Di makalahutay ang imong suweldo sa mga galastohan. Hatagan mog atensiyon ang emosyon. Suwerte mong adlaw ang Domingo ug palaran mong numero ang 1, 6, 7.

CANCER – (Hunyo 21 – Hulyo 22) – Kapahimuslan mo na ang imong makat-onan sa tambongan mong pasinati. Daghan ang mosundog sa imong mga diskarte. Di mo ipanghakog ang imong nahibaloan. Magmalamposon ka sa umaabot nga panahon. Mahuwasan ang imong kahidlaw. Sabado ang suwerte mong adlaw ug 2, 5, 4 ang palaran mong numero.

LEO – (Hulyo 23 – Agosto 22) – Niining bulana madugangan ang pagsalig sa imong kaugalingon. Magmalaomon kang hugopan sa katawhan ang gipasiugdahan mong proyekto. Dako kinig ikatabang sa mga kabos. Magmalungtaron ang sudlan mong relasyon. Suwerte mong adlaw ang Martes ug palaran mong numero ang 3, 6, 8.

VIRGO – (Agosto 23 – Septiyembre 22) – Ligonon mo ang imong kinabuhing espiritwal. Mosimba ka na kanunay matag Domingo. Biyaan mo na ang imong mga bisyo. Mosubay ka nas tulid nga dalan sa kinabuhi. Magmanggihatagon ka. Masum-ok kag talagsaong abentura sa gugma. Lunes ang suwerte mong adlaw ug 2, 3, 6 ang palaran mong numero.

LIBRA – (Septiyembre 23 – Oktubre 22) – Niining buwana makabaton kag kalinaw sa panghunahuna. Kinahanglan nga magrelaks ka lang. Di ka angayng maapektohan sa stress kay makahatag kinig sakit kanimo. Makigsandurot ka sa isigkaingon. Kusog ang imong karisma. Suwerte mong adlaw ang Sabado ug palaran mong numero ang 6, 5, 3.

SCORPIO – (Oktubre 23 – Nobiyembre 21) – Di mo pasagdan nga mahitumpawak sa kaalaotan ang imong mga manghod. Giyahan mo sila nga mahadlokon sa Diyos. Ikaw na ang magdisiplina nila kay ikaw na ang isipon nilang amahan. Makahibalag kag binuhat nga mounong kanimo. Domingo ang suwerte mong adlaw ug 8, 7, 2 ang palaran mong numero.