Mirror Of Fortune

(ANG INYONG KAPALARAN SA MAYO 2023)

SAGITTARIUS – (Nobiyembre 22 – Disyembre 21) – Dapiton kang mamulong sa usa ka programa. Tin-aw ang imong pagpasabot sa tema. Mokaw-it sa atensiyon sa nanambong ang imong pakigpulong. May mohatag kanimog pabor nga lisod balibaran. Masabtan mo ang kablit. Biyernes ang suwerte mong adlaw ug 2, 9, 7 ang palaran mong numero.

CAPRICORN – (Disyembre 22 – Enero 19) – Niining buwana mahan-ay na ang sugdan mong sulaton nga nobela. Ipatik kini sa inilang magasin. Daghan ang naghulat nga mga magbabasa. Naila ka nang maayong magsusulat. Makahibalag kag binuhat nga mounong kanimo. Suwerte mong adlaw ang Miyerkoles ug palaran mong numero ang 6, 2, 8.

AQUARIUS – (Enero 20 – Pebrero 18) – Makabig ka sa pagpasabot sa imong uyoan. Makombensir ka nga ipadayon ang imong pagtuon nga siya ang moabaga sa galastohan. Mabaid na gayod og maayo ang imong salabotan. Malaomon ang gipasalig sa imong gihalaran. Domingo ang suwerte mong adlaw ug 5, 8, 1 ang palaran mong numero.

PISCES – (Pebrero 19 – Marso 20) – Niining buwana mopatim-aw kanimo ang senyales nga magmalamposon ka sa imong gipangandoy. Doblehon lang gyod ang imong kakugi. Di makawang ang imong paghago. Magmasaligon ka lang. Kusog ang imong sex appeal. Suwerte mong adlaw ang Sabado ug palaran mong numero ang 4, 5, 6.

ARIES – (Marso 21 – Abril 19) – Motambayayong ka sa kalikohang pangkomunidad. Dali kang makakombinser sa imong mga silingan. Kinahanglan nga daling mahuman ang proyekto sa patubig. Angayng magkahiusa ang tanan. Matagbawon ang romansa. Huybes ang suwerte mong adlaw ug 7, 8, 9 ang palaran mong numero.

TAURUS – (Abril 20 – Mayo 20) – Niining buwana makahunahuna kang mosulay sa pagnegosyo. Gamiton mong kapital ang natigom mong kantidad. Tun-an mog maayo ang hustong diskarte. Way makababag sa imo unyang pag-asenso. Ikabutyag mo na ang imong pagbati. Suwerte mong adlaw ang Lunes ug palaran mong numero ang 6, 3, 2

GEMINI – (Mayo 21 – Hunyo 20) – Molambo ang gitukod mong negosyo. Daghan ang nakagusto sa imong mga gipangtinda. Mokusog pa ang halin sa umaabot nga panahon. Ayohon mo lang pagtratar ang imong mga kostumer. Mapugsanon ang agni sa pahiyom. Miyerkoles ang suwerte mong adlaw ug 7, 5, 3 ang palaran mong numero.

CANCER – (Hunyo 21 – Hulyo 22) – Niining buwana kinahanglan nga tumanon mo ang imong gisaad. Mabulingan unya ang imong dungog. Wala nay mosalig kanimo. Ampingi gayod ang imong ngalan. Di mapiog ang imong baroganan. Makatilaw kag lahing romansa. Suwerte mong adlaw ang Sabado ug palaran mong numero ang 9, 2, 1.

LEO – (Hulyo 23 – Agosto 22) – Gikinahanglan nimo ang dugang nga income. Dawaton mo na gayod ang gitanyag nga ekstrang trabaho. Di na makadispaser ang imong suweldo. Angay lang nga hugtan na sa bakos ang pagbadyet. Di kapugngan ang paghangos sa kalami. Huybes ang suwerte mong adlaw ug 4, 5, 3 ang palaran mong numero.

VIRGO – (Agosto 23 – Septiyembre 22) – Niining buwana mahuman na ang pag-asikaso sa mga dokumento alang sa imong pag-abroad. Matuman ra gayod ang dugay na nimong gipangandoy nga makatrabaho sa laing nasod. Ikahibalag mo na ang binuhat nga molipay kanimo. Suwerte mong adlaw ang Martes ug palaran mong numero ang 8, 1, 6.

LIBRA – (Septiyembre 23 – Oktubre 22) – Molagsik ra ang imong panglawas human sa sobrang kakapoy sa imong pagtrabaho. Bahinon mo ang imong panahon sa pagtrabaho ug paglulinghayaw. Mogahin ka usab og panahon sa pagsimba. Pahinuntan mo ang aghat sa kahidlaw. Biyernes ang suwerte mong adlaw ug 7, 4, 9 ang palaran mong numero.

SCORPIO – (Oktubre 23 – Nobiyembre 21) – Niining buwana maganoy ka sa kalihokang pangkomunidad. Daghan ang makamatikod sa gihuptan mong kaligdong. Dako ang purohan nga ituboy ka nilang lider. Mogilaw ang imong bituon. Madasigon ang kinabuhing sekswal. Suwerte mong adlaw ang Martes ug palaran mong numero ang 6, 8, 4.