Ungik

ITI kaadumi, kasla sardinaskami nga agkakabsat ken agkakaarruba a napidipid iti nangilugananda kadakami. Adu ti agsasangit. Uray siak— ta malagipko daydi aldaw a pannakaipusingko kadagiti kakabsatko.

“Inka man kitaen ‘diay baboy, Sadiri! Kasta unay ungiknan!” immandar idi ni Nana Pacing iti inauna nga anakda ken Tata Doming.

Ungik, kunada, ngem sangitmi. Agungikkami no maladingitankami, no masaktankami, no mabisinkami— ken uray pay maragsakankami. “Mabisinka?” sinaludsod ni Sadiri idi kaniak. Inkul-obko ketdi. Kas iti butengko idi immayda insako dagiti tallo a kakabsatko.

“Maikawaka iti kaawan dagiti kakabsatmo?” Bimmaringkuasak. “Oink! Oink!” kinunak. Mabutengak. Maasianak kadagiti kakabsatko. Naguubbingda a matay. Dida man laeng naipapas ti agbiag. Lutuenda kano ida iti maysa a restauran a kas lechon de leche.

“Pasiensiakan, a. Pagtakongendakayo koma ngem masapul ni Saniata ti kuarta.” Naliday ni Sadiri a nangapapros iti ulok.

Intarayda iti ospital ni Saniata ta simken ti angkitna. Uppat ti tawenna iti naudi nga ididikarna. Disisaisnan. Marigatan kano nga umanges.

“Nairana pay met nga adda COVID-19,” kinuna ni Sadiri.

Adda ni Tata Doming idiay ospital ta iti dayta nga aldaw a rummuar ti resulta ti swab test ni Saniata. Ikarkararagda a negatibo ti resultana. Ta no dida pay la kano mairuar kalpasan ti tallo nga aldaw, maibuston ti naglakuanda kadagiti kakabsatko.

Di pay siak ti isarunodan nga ilako? Ay, diak kayat ti matay nga immub-ubingan!

Pagyamanak ta nagnegatibo ni Saniata ket dimmakkelak a nabaludbod. Nakananama a pangganakan! kuna ngarud ni Tata Doming.

Pudno a nawalatak. Ap-apalandak dagiti uppat a kakabsatko— a simmaruno a nayanak kadakami— a kinadkaduak iti ubong ta pagtakongenda kano met ida. Kinapudnona, masikogakon.

“Adunto ti anakna!” kuna ni Tata Doming. Napalalo met a ragsak ni Nana Pacing.

Naragsakak met. Inkarkararagko laeng a dinto koma agbanag a kas kadagiti kakabsatko dagiti agbalinto nga annakko. Uray ilakodanto met laeng ida no dadakkeldanton. Maawatkon dayta ta kastoy a talaga ti serbimi a baboy— ibuismi ti biagmi tapno agbiag ti tao.

Ngem no adda pagbutbutngan dagiti tattao a COVID-19, adda met sakit a pangta iti biagmi a baboy. Nagsangsangit ni Nana Pacing bayat ti panagsarsaritada ken Tata Doming itay napalabas a lawas.

“Adda kanon African Swine Fever iti kabangibang a purok, lakay!” kinunana a matartaranta.

Masakupannakami kano ti 1-7-10 protocol a mangpapatay iti amin a baboy a mawadawadan ti maysa a kilometro.

“Ania pay ti pangnamnamaan a pagtuision dagiti ubbing, lakay!” inyugaog ni Nana Pacing itay iluglugandakami. Itay la ket ngaruden, naglusdoyen.

Nagasat dagiti tattao a ma-COVID ta ikuarantinada ida. Ngem dakami a baboy, agtaruskami iti tanem.

Awan ti di naladingit kadakami. Pati ti tangatang, imbuyatna met ti luana bayat ti kapigsa ti sangitmi. Maawatak met ketdi koma daytoy a kapay-anmi ta patayto met laeng ti tungpalmi. Maluksawak laeng ta napia pay dagidi kakabsatko nga inay-ay-ayko ta nakatulongda. Siak, pinadpadakkeldak nga awan serserbina.

Sayang a biag.—O