Daydi Rabii

Anik-ik dagiti agiinnuna a kurarapnit A mangsippayot kadagiti naluom a bunga

Ti basug a saksi ti panangsapulko iti balitok Kadagiti kinelleng a pangituntunekak iti namnama Ti linglingay ti sardam ditoy nagmumungotan Dagiti bantay a nangmuli iti kinaubingko

A pasaray rukoden ti lagip no makalagip

A sumikal iti panunot kabayatan Ti panangdepdeppa ti pattapatta

Iti kawatiwat pay ti rabii

A naatap ti ridep ta makaringgor latta iti panunot Dagiti gandat a di pay naisaganaan

Ti addang sakbay a pumuyupoy ti pul-oy Ti parbangon a mangpasikal iti agsapa Ngem daytoy a rabii, alimbasagen

Ti rikna a mangmatmatimat iti kaltaang

Nga itay pay a daydayyengan dagiti kuriat A mangin-intonar iti daniw a yar-arasaas

Ti danum ti waig a mangsawar kadagiti kinelleng A mangur-uray iti anniniwan ti agsapa Apaman a makaawid dagiti kurarapnit

Iti no sadino a rumiet nga aponda

Ket mabati dagiti linnaaw

A maisibug iti arapaap a sinukog ti nagpatnag.

—RONNIE E. AGUINALDO