Dear Ikit

Dear Ikit,

Adda ni nanang idiay Amerika. Aminkami nga annakna a di pay naasawaan, pinetisionanna tapno makapankami met idiay yanna. Inyunay-unayna idi ti saanmi a panangikasar kadagiti kabbalaymi uray no addan annakmi.

Idi mainterbiukami iti US Embassy, naikkan iti immigrant visa dagiti kakabsatko. Nagluasda a dagus. Dakami ken adingko ti nabati. Adda ngamin sakit ti barana, idinto a siak, adda gayam kanagnaganko nga adda kasona.

Adda dua nga annakmin ken baket. Ti pagdaksanna, naikawaak iti kaarrubami ket masikog metten. Daytoy nanang ti nasikogak, inawaganna ti ikitmi a nurse nga adda idiay Amerika. Nagsinnungbatda. Idi kuan, inawagannak met ni ikit (isu ngamin ti nangpabasa kaniak iti koleho). Bimmaraak ket nasungbatak ti ikitko. Ita, nagdinamag iti lugarmi ken uray pay idiay Amerika a yan dagiti kakabagianmi nga awan kano ti utangko a naimbag a nakem.

Itay met nabiit, adda naawatko a surat ti US Embassy a mangtedak iti Police Clearance manipud ditoy ilimi, baro nga NBI Clearance, ken Affidavit a saan a siak daydiay addaan iti kaso.

Sipapalubos ti ina dagitoy annakko a mapanak idiay Amerika ngem adda met bainko a mapanen sadiay gapu iti inaramidko. Ania ti aramidek, ikit?—Caloy

Caloy,

No mabainka iti inaramidmo, kayatna a sawen nga adda nakemmo. Awagam ni ikitmo ket agdawatka iti pammawakan.

Ita, maipanggep iti immigrant visam. Saan nga ited ti Embassy kenka daytoy no dimo ited kadakuada dagiti kasapulanda a dokumento. Kasapulan nga iti uneg ti makatawen, idatagmo dagitoy kadakuada ta no saan, narigatton a makapanka.

Mapanka iti abogado tapno agpaaramidka ti apidabit nga awan ti ania man a kaso a nakairamanam. Kalpasanna, mangalaka ti Police Clearance, sakanto mapan mangala ti NBI Clearance. Ipakitam dagita apidabit ken Police Clearance-mo diay NBI.

Basaem ken awatem a nalaing ti nailanad iti surat ti US Embassy-no kasapulam pay laeng ti ipapanmo sadiay wenno ipaw-itmo dagitoy a kasapulanda babaen ti pribado a courier a kinakontrata ti US Embassy. Kaaduanna a no nalpas ti pananginterbiu ti US Embassy iti aplikante ket adda kurang a dokumento, maibalakad ti panangipatulodna iti daytoy iti pribado a courier a konektado iti Embassy.

Laglagipem nga iti kada panid ti dokumento nga ipatulodmo, isuratmo iti akinkanawan a suli ti papel ‘diay Case Number-mo ken Invoice ID Number nga inted ti National Visa Center.

Maipangep iti sakit ni adingmo a nasukalan idi nagpamedikal, awatenyo a nalaing ti nailanad nga aramidenyo. Ammok a pagsublienda tapno maeksamen a nalaing. Mangtedda pay iti agas a tomarenna agingga a malaingan.

Apaman a naipatulodmo dagiti kasapulan a dokumento, amangan no awan pay makabulan sumangpeten dayta visam.—Ikitmo