Manipud iti Social Media

Idi, kas ita, napadasanna ti naglua, agsipud iti kinakurapay ken kinanumona ken panagmaymaysa. Ita, agmaymaysa manen, agmaymaysa iti kinabaknang a maipangpangta nga agpukaw a kas iti asuk. Maymaysa itan ti kabutengna iti biag-ti pannakayawyaw amin a nagbannoganna.

Nakigubat iti kinakurapay tapno madanonna daytoy a yanna ita. Sisasagana met a makigubat iti kinabaknang tapno agtalinaed dagiti nagbannoganna.

Ti maikadua a ladawan, naala iti kamanian iti Tanap ti Ylocos a nagtarayanna kalpasan a nalugi ti ulitegna kadagiti bakana agsipud iti foot and mouth disease.

“No kayatmo ti aglayas, nawayakan, Bileg,” kinuna idi ti lakay. “Awan ti pangpabasak kenka. Umanayen a ti apeliedok ti tawidem.”

Iti labes ti rigat, saanna nga akuen a baybay-anna ti ulitegna. Ngem ammona nga addaan met iti bukod a biag a sanguen.

Naglugan idi iti bus, ti bus nga agrikus iti Poro Ylocos. Panggepna idin ti mapan iti siudad, ditoy siudad ti Cadaclan, ngem daksanggasat ta iti bisinna, nakaturog ket nailabes. Ket idi agbalaw, addan iti sakup ti ili ti Oaig Sur. Siningir ti konduktor ti pletena, ngem nagngilangil laeng.

“Awan a pulos ti kuartak, manong,” kinunana.

“Sumurotka man ngarud iti biahe, napia laeng a pangabrotan iti pletem,” kinuna ti laklakay la ngata ngem isuna a konduktor. Agtawen idin iti katorse, kalepleppas ti klase iti maikadua a tukad iti hayskul.

Simmurot iti bus; para karga kadagiti bagahe, para danum iti makina, para awag kadagiti pasahero, para padigos iti bus. Makalawas a kasta agingga iti imbingayanda iti masapulanda. Dita a nakitana dagiti nalawa a pagtatalonan iti Tanap. Inapalanna dagiti nagdadakkel nga inubba dagiti mais, dagiti narnuoyan ken agsaringgayad a dawa ti pagay, dagiti sinaksako a tarong, okra, paria ken utong.

Mannalon met ti nagtaudak, nagagetak, kinunana iti bagina. Padasek ketdi ti gasatko, inkeddengna.

(Maituloyto)